തിരുവനന്തപുരം: ആലപ്പുഴയില്‍ യൂത്ത് കോണ്‍ഗ്രസ് പ്രവര്‍ത്തകരെ മര്‍ദ്ദിച്ച കേസിന്റെ അന്വേഷണത്തിന്റെ ഭാഗമായി എഡിജിപി ഓഫീസില്‍ പ്രത്യേക അന്വേഷണസംഘം (എസ്‌ഐടി) പരിശോധന നടത്തി. ഡി.വൈ.എസ്.പി ബൈജു പൗലോസിന്റെ നേതൃത്വത്തിലുള്ള സംഘമാണ് പരിശോധന നടത്തിയത്. കേസുമായി ബന്ധപ്പെട്ട സന്ദര്‍ശക രജിസ്റ്റര്‍, ഓഫിസിലെ സി.സി.ടി.വി ദൃശ്യങ്ങള്‍, പൊലിസ് ക്ലബിലെ രേഖകള്‍ എന്നിവ എസ്‌ഐടി ശേഖരിച്ചു.

എഡിജിപി ഓഫീസില്‍ വെച്ച് കേസുമായി ബന്ധപ്പെട്ട രേഖകളില്‍ തിരുത്തല്‍ നടത്തിയെന്ന മൊഴി മുന്‍ അന്വേഷണസംഘം നല്‍കിയിരുന്നു. ഇതിന്റെ അടിസ്ഥാനത്തിലാണ് എസ്‌ഐടി വിശദമായ പരിശോധന നടത്തിയത്. ഒരു കേസിന്റെ അന്വേഷണത്തിന്റെ ഭാഗമായി എഡിജിപി ഓഫീസില്‍ പരിശോധന നടത്തുന്നത് ആദ്യമായാണെന്നാണ് വിവരം.

ALSO READ: ദേശീയപാതയ്ക്ക് ഇരുട്ടടിയായി കെ.എസ്.ഇ.ബി. ഉത്തരവ്; തെരുവുവിളക്കുകളുടെ വൈദ്യുതിബില്‍ മൂന്നിരട്ടിയിലേറെയാകുമെന്ന് ആശങ്ക 

അതേസമയം, കേസിലെ പ്രതികളായ അഞ്ച് പൊലിസ് ഉദ്യോഗസ്ഥര്‍ക്ക് അനുവദിച്ച മുന്‍കൂര്‍ ജാമ്യം റദ്ദാക്കണമെന്ന സര്‍ക്കാര്‍ അപ്പീലില്‍ ഹൈക്കോടതി പ്രതികളുടെ വിശദീകരണം തേടി. ഈ മാസം 27നകം മറുപടി നല്‍കാന്‍ കോടതി നിര്‍ദേശിച്ചു.

മുഖ്യമന്ത്രി പിണറായി വിജയന്റെ ഗണ്‍മാന്‍മാരായ അനില്‍ കല്ലിയൂര്‍, സന്ദീപ് എന്നിവരടക്കം അഞ്ച് പൊലിസ് ഉദ്യോഗസ്ഥര്‍ക്ക് അനുവദിച്ച മുന്‍കൂര്‍ ജാമ്യം റദ്ദാക്കണമെന്നാണ് എസ്‌ഐടിയുടെ ആവശ്യം. യൂത്ത് കോണ്‍ഗ്രസ് പ്രവര്‍ത്തകരെ മര്‍ദ്ദിക്കാന്‍ ഉപയോഗിച്ച ലാത്തി ഉള്‍പ്പെടെയുള്ള തെളിവുകള്‍ കണ്ടെത്തിയെന്ന നിരീക്ഷണത്തിന്റെ അടിസ്ഥാനത്തിലായിരുന്നു ആലപ്പുഴ പ്രിന്‍സിപ്പല്‍ സെഷന്‍സ് കോടതി ജഡ്ജി ഹണി എം. വര്‍ഗീസ് മുന്‍കൂര്‍ ജാമ്യം അനുവദിച്ചത്.

എന്നാല്‍ മര്‍ദ്ദനത്തിന് ഉപയോഗിച്ച ലാത്തി കണ്ടെത്തിയെന്ന കോടതിയുടെ നിരീക്ഷണം വസ്തുതാപരമായി തെറ്റാണെന്നും, അന്വേഷണം പുരോഗമിക്കുന്ന ഘട്ടത്തില്‍ മുന്‍കൂര്‍ ജാമ്യം അനുവദിച്ചത് കേസിന്റെ തുടര്‍ അന്വേഷണത്തെ പ്രതികൂലമായി ബാധിക്കുമെന്നുമാണ് എസ്‌ഐടിയുടെ വാദം. കേസില്‍ കൂടുതല്‍ തെളിവുകള്‍ ശേഖരിക്കുന്ന നടപടികള്‍ തുടരുകയാണെന്നും അന്വേഷണസംഘം കോടതിയെ അറിയിച്ചു.

As part of the investigation into the case of assault on Youth Congress workers in Alappuzha, a Special Investigation Team (SIT) conducted an inspection at the ADGP office. The team led by DySP Baiju Paulose carried out the inspection. The SIT collected the visitor register, CCTV footage from the office, and documents from the police club related to the case.