കൊച്ചി: ഇന്ത്യൻ ക്രിക്കറ്റിനെ പിടിച്ചുകുലുക്കിയ ഐപിഎല്ലിലെ കുപ്രസിദ്ധമായ 'സ്ലാപ്പ്ഗേറ്റ്' (Slapgate) വിവാദം രണ്ട് പതിറ്റാണ്ടുകൾക്ക് ഇപ്പുറം വീണ്ടും പുകയുന്നു. മുൻ ഇന്ത്യൻ ഓഫ് സ്പിന്നർ ഹർഭജൻ സിങ്ങിനെ ബോക്സിങ് റിങ്ങിലേക്ക് പരസ്യമായി വെല്ലുവിളിച്ചുകൊണ്ട് മലയാളി താരം എസ്. ശ്രീശാന്ത് രംഗത്തെത്തിയതോടെയാണ് ഇരുവരും തമ്മിലുള്ള ശത്രുത വീണ്ടും പുതിയ അധ്യായത്തിലേക്ക് കടന്നിരിക്കുന്നത്. പ്രശസ്ത മാധ്യമമായ 'ദി ലല്ലൻടോപ്പിന്റെ' (The Lallantop) 'ഗസ്റ്റ് ഇൻ ദി ന്യൂസ്റൂം' പരിപാടിയിലാണ് ശ്രീശാന്ത് ഹർഭജനെതിരെ കടുത്ത ആരോപണങ്ങളുമായി ആഞ്ഞടിച്ചത്.

പഴയ വിവാദങ്ങൾ മറന്ന് ഇരുവരും സൗഹൃദത്തിലായെന്ന് ക്രിക്കറ്റ് ലോകം കരുതിയിരിക്കെയാണ് കടുത്ത വെല്ലുവിളിയുമായി ശ്രീശാന്ത് എത്തിയത്. ബോക്സിങ് വസ്ത്രങ്ങൾ ധരിച്ച് ഇരുവരും നിൽക്കുന്ന പഴയൊരു പ്രമോഷൻ ഫോട്ടോ ചൂണ്ടിക്കാണിച്ചുകൊണ്ടായിരുന്നു ശ്രീശാന്തിന്റെ തുറന്ന യുദ്ധപ്രഖ്യാപനം.

'പരസ്യങ്ങളിലൂടെയല്ല, നേരിട്ട് കാണാം'

തങ്ങളുടെ കരിയറിലെ ഏറ്റവും കറുത്ത അധ്യായത്തെ ഹർഭജൻ സിങ് ഇപ്പോഴും വാണിജ്യവൽക്കരിക്കുകയാണെന്നും അതിലൂടെ ലക്ഷങ്ങൾ ലാഭമുണ്ടാക്കുകയാണെന്നും ശ്രീശാന്ത് ആരോപിക്കുന്നു. കോംബാറ്റ് സ്പോർട്സിലെ തന്റെ പുതിയ പങ്കാളിത്തം ഊന്നിപ്പറഞ്ഞുകൊണ്ട് ശ്രീശാന്ത് ലല്ലൻടോപ്പിനോട് പറഞ്ഞത് ഇങ്ങനെയാണ്:

"ഇതേ രംഗം... നിനക്ക് ധൈര്യമുണ്ടോ? എന്നോടൊപ്പം റിങ്ങിലേക്ക് വരാൻ നിനക്ക് ധൈര്യമുണ്ടോ? ഒപ്പിട്ട് വരാമോ? ഞാൻ അവനോട് ചോദിക്കുകയാണ്. ഇതേ ഗ്ലൗസുകൾ ധരിച്ച് വരാൻ ധൈര്യമുണ്ടോ? ഇത് അഭിനയമല്ല. ഞാൻ പുഞ്ചിരിക്കുകയാണ്, നീ എന്താണ് ചെയ്യുന്നതെന്ന് എനിക്കറിയില്ല. നമുക്ക് നോക്കാം, ഇതൊരു തുറന്ന വെല്ലുവിളിയാണ്."

"ഞാൻ ഇപ്പോൾ 'ബെയർ നക്കിൾ ഫൈറ്റ് ലീഗിന്റെ' (Bare Knuckle Fight League) ഭാഗമാണ്. ഭാജ്ജി, ഞാൻ നിന്നെ വെല്ലുവിളിക്കുകയാണ്. നിനക്കും എനിക്കും ആ പഴയ 'അടി' സംഭവത്തിൽ അത്രയധികം പ്രശ്നമുണ്ടെങ്കിൽ, നീ അതിലൂടെ ഇത്രയധികം സമ്പാദിക്കുന്നുണ്ടെങ്കിൽ... എന്നെയും കുറച്ച് സമ്പാദിക്കാൻ അനുവദിക്കൂ. റിങ്ങിലേക്ക് വരൂ. ഞാൻ എന്റെ ഹൃദയത്തിൽ നിന്നാണ് വിളിക്കുന്നത്. നമുക്ക് ആത്മാഭിമാനമുണ്ടെങ്കിൽ പരസ്യങ്ങളും മറ്റും ചെയ്ത് കളിക്കരുത്. എല്ലാ മലയാളികൾക്കും എല്ലാ സർദാർമാർക്കും വേണ്ടി, ദയവായി വരൂ. ഞാൻ കാത്തിരിക്കുകയാണ്."

ബന്ധം തകർത്ത ആ 'പരസ്യം'

2008-ലെ ആദ്യ ഐപിഎൽ സീസണിൽ മുംബൈ ഇന്ത്യൻസ്-കിങ്സ് ഇലവൻ പഞ്ചാബ് മത്സരത്തിന് ശേഷം ഹർഭജൻ ശ്രീശാന്തിന്റെ മുഖത്തടിക്കുകയായിരുന്നു. അന്ന് മൈതാനത്ത് കരഞ്ഞുനിൽക്കുന്ന ശ്രീശാന്തിന്റെ ചിത്രം വലിയ വിവാദങ്ങൾക്ക് വഴിവെച്ചു. പിന്നീട് ഇരുവരും ഒന്നിച്ച് പരസ്യങ്ങളിൽ അഭിനയിക്കുകയും പ്രശ്നങ്ങൾ പരിഹരിച്ചതായി തോന്നിക്കുകയും ചെയ്തിരുന്നു.

എന്നാൽ അടുത്തിടെ ഹർഭജൻ അഭിനയിച്ച പുതിയൊരു പരസ്യമാണ് ശ്രീശാന്തിനെ വീണ്ടും ചൊടിപ്പിച്ചത്. സ്ലാപ്പ്ഗേറ്റ് സംഭവത്തെ പരിഹസിക്കുന്ന തരത്തിലുള്ളതായിരുന്നു ആ പരസ്യമെന്നും, തന്റെ ജീവിതത്തിലെ കഠിനമായ ഒരു കാലഘട്ടത്തെ ഹർഭജൻ പണമുണ്ടാക്കാൻ ഉപയോഗിച്ചെന്നും ശ്രീശാന്ത് ആരോപിക്കുന്നു. ആ പരസ്യത്തിലൂടെ ഹർഭജൻ 80 ലക്ഷം മുതൽ ഒരു കോടി രൂപ വരെ സമ്പാദിച്ചതായും, ആ വീഡിയോ ഇൻസ്റ്റഗ്രാം സ്റ്റോറിയായി പങ്കുവെക്കാൻ ഹർഭജൻ ആവശ്യപ്പെട്ടതോടെയാണ് താൻ അദ്ദേഹത്തെ ബ്ലോക്ക് ചെയ്തതെന്നും ശ്രീശാന്ത് മുൻപ് വ്യക്തമാക്കിയിരുന്നു."ക്ഷമിക്കാം, പക്ഷേ ഒരിക്കലും മറക്കില്ല" എന്ന നിലപാടിലാണ് ശ്രീശാന്ത് ഇപ്പോൾ. എന്നാൽ ശ്രീശാന്തിന്റെ ഈ കടുത്ത പ്രതികരണങ്ങളോടോ ബോക്സിങ് ചലഞ്ചിനോടോ ഹർഭജൻ സിങ് ഇതുവരെ ഔദ്യോഗികമായി പ്രതികരിച്ചിട്ടില്ല.