ഫിലാഡൽഫിയ: 2026 ഫിഫ ലോകകപ്പിലെ തങ്ങളുടെ രണ്ടാമത്തെ കനത്ത പോരാട്ടത്തിന് അഞ്ചുതവണത്തെ ലോകചാമ്പ്യന്മാരായ ബ്രസീൽ നാളെ ഇറങ്ങുന്നു. ഗ്രൂപ്പ് സി-യിലെ നിർണായക മത്സരത്തിൽ കരീബിയൻ കരുത്തരായ ഹെയ്തിയാണ് കാനറിപ്പടയുടെ എതിരാളികൾ. ഇന്ത്യൻ സമയം നാളെ രാവിലെ 6:00 മണിക്ക് (പ്രാദേശിക സമയം വെള്ളിയാഴ്ച രാത്രി 8:30) ഫിലാഡൽഫിയ സ്റ്റേഡിയത്തിലാണ് മത്സരം. ആദ്യ മത്സരത്തിൽ ആഫ്രിക്കൻ കരുത്തരായ മൊറോക്കോയോട് 1-1 ന് സമനില വഴങ്ങിയ ബ്രസീലിന് ടൂർണമെന്റിൽ ശക്തമായി തിരിച്ചെത്താൻ ഈ മത്സരത്തിൽ വിജയം അനിവാര്യമാണ്. മറുഭാഗത്ത് ആദ്യ മത്സരത്തിൽ സ്കോട്ലാൻഡിനോട് എതിരില്ലാത്ത ഒരു ഗോളിന് പരാജയപ്പെട്ട ഹെയ്തിക്കും ലോകകപ്പിൽ നിലനിൽക്കാൻ ഈ മത്സരം നിർണായകമാണ്.

 

 

കേവലം ഒരു വിജയത്തിനപ്പുറം ലോകകപ്പ് ചരിത്രത്തിലെ ഏറ്റവും വലിയൊരു റെക്കോർഡും നാളെ ബ്രസീലിനെ കാത്തിരിക്കുന്നുണ്ട്. ലോകകപ്പ് വേദിയിൽ ഏറ്റവും കൂടുതൽ ഗോളുകൾ നേടുന്ന ടീമെന്ന സിംഹാസനമാണ് ബ്രസീലിന്റെ ലക്ഷ്യം.

 

നിലവിൽ 239 ഗോളുകളുമായി ജർമനിയാണ് ഈ പട്ടികയിൽ ഒന്നാമത്. 238 ഗോളുകളുള്ള ബ്രസീൽ തൊട്ടുപിന്നിലുണ്ട്. നാളത്തെ മത്സരത്തിൽ ഹെയ്തിക്കെതിരെ രണ്ട് ഗോളുകൾ കണ്ടെത്താൻ കഴിഞ്ഞാൽ ജർമനിയെ മറികടന്ന് ബ്രസീലിന് ലോക റെക്കോർഡിൽ ഒന്നാം സ്ഥാനത്തേക്ക് കുതിക്കാം.

 

 

1. ജർമനി-239
2. ബ്രസീൽ- 238
3. അർജന്റീന- 152
4. ഫ്രാൻസ്- 136
5. ഇറ്റലി -128

 

2026 ലോകകപ്പ് ആരംഭിക്കുമ്പോൾ 232 ഗോളുകളുമായി ബ്രസീൽ തന്നെയായിരുന്നു മുന്നിൽ. എന്നാൽ തങ്ങളുടെ ആദ്യ മത്സരത്തിൽ കുറാസാവോയെ എതിരില്ലാത്ത 7 ഗോളുകൾക്ക് തകർത്തുവിട്ടാണ് ജർമനി ഒന്നാം സ്ഥാനം പിടിച്ചടക്കിത്. 2014-ൽ ബ്രസീലിന്റെ നെഞ്ചകം തകർത്ത 7-1 ന്റെ വിജയത്തെ ഓർമ്മിപ്പിക്കുന്നതായിരുന്നു ജർമനിയുടെ ഈ പ്രകടനം. എന്നാൽ ഈ ജർമൻ ആധിപത്യത്തിന് തങ്ങളുടെ തനത് ശൈലിയിൽ മറുപടി നൽകാനുറച്ചാണ് വിനീഷ്യസ് ജൂനിയറിന്റെ നേതൃത്വത്തിൽ കാനറിപ്പട നാളെ ബൂട്ട് കെട്ടുന്നത്. മൊറോക്കോയ്ക്കെതിരായ ആദ്യ മത്സരത്തിൽ ബ്രസീലിനായി ഗോൾ നേടിയത് വിനീഷ്യസ് ആയിരുന്നു.

 

 

മറുഭാഗത്ത്, ഫ്രഞ്ച് പരിശീലകൻ സെബാസ്റ്റ്യൻ മീനിയുടെ കീഴിലിറങ്ങുന്ന ഹെയ്തി നീണ്ട 52 വർഷത്തെ കാത്തിരിപ്പിന് ശേഷമാണ് ഇത്തവണ ലോകകപ്പ് കളിക്കാനെത്തുന്നത്. 1974-ലായിരുന്നു ഹെയ്തി അവസാനമായി ലോകകപ്പ് കളിച്ചത്. സ്കോട്ലാൻഡിനോട് നിർഭാഗ്യം കൊണ്ട് മാത്രമാണ് അവർ ആദ്യ മത്സരത്തിൽ പരാജയപ്പെട്ടത്. പ്രതിരോധക്കോട്ട കെട്ടി ബ്രസീലിനെ തളയ്ക്കാനും കൗണ്ടർ അറ്റാക്കുകളിലൂടെ അട്ടിമറി സൃഷ്ടിക്കാനും ഹെയ്തിക്ക് കഴിഞ്ഞേക്കുമെന്നതിനാൽ ബ്രസീലിന് മത്സരം അത്ര എളുപ്പമാകില്ല.