പട്‌ന: ബിഹാറിലെ രാജ്ഗറില്‍ ക്ഷേത്ര ഉത്സവത്തിനിടെ മോഷണക്കുറ്റം ആരോപിച്ച് രണ്ട് ദളിത് യുവാക്കളെ തല്ലിക്കൊന്നു. 'മല്‍മാസ്'  ആഘോഷങ്ങള്‍ക്കായി രാജ്ഗറിലെ ജൂന്‍കിയ ബാബ ക്ഷേത്ര പരിസരത്ത് എത്തിയ യുവാക്കളെയാണ് ക്രൂരമായി മര്‍ദിച്ച് കൊലപ്പെടുത്തിയത്. 

പിന്റു പസ്വാന്‍ (24), ശ്രാവണ്‍ പസ്വാന്‍ (18) എന്നിവരാണ് മരിച്ചത്. നളന്ദ ജില്ലയിലെ ഗഞ്ച്പാര്‍ ഗ്രാമത്തില്‍ നിന്നുള്ളവരാണ് ഇരുവരും. ഞായറാഴ്ച്ച രാത്രിയോടെയാണ് ഇവര്‍ ക്ഷേത്രത്തിലെത്തിയത്. 

മോഷണ ആരോപണം, കൊലപാതകത്തിലേക്ക്

തിങ്കളാഴ്ച്ച പുലര്‍ച്ചെ 3.30ഓടെയാണ് സംഭവം. ക്ഷേത്ര പരിസരത്ത് എത്തിയ നാലോളം ചെറുപ്പക്കാര്‍ക്ക് നേരെ കമ്മിറ്റി അംഗങ്ങള്‍ മോഷണക്കുറ്റം ആരോപിക്കുകയായിരുന്നു. 

സമീപ ദിവസങ്ങളിലായി പ്രദേശത്ത് നിരവധി മോഷണ ശ്രമങ്ങള്‍ നടന്നിരുന്നതായും, ഇത് ഭക്തരെ രോഷാകുലരാക്കിയെന്നും ക്ഷേത്ര ഭാരവാഹികള്‍ പറഞ്ഞു. മാല്‍മസ് ചടങ്ങിന്റെ ഭാഗമായി ആയിരക്കണക്കിന് ആളുകള്‍ ക്ഷേത്രത്തിലെത്തിയിരുന്നു. യുവാക്കളുടെ പ്രവൃത്തികളില്‍ സംശയം തോന്നിയ ഭക്തര്‍ അവരെ പിന്തുടര്‍ന്ന് ആക്രമിക്കുകയായിരുന്നെന്നും ക്ഷേത്ര ഭാരവാഹികള്‍ പറയുന്നു. നാലുപേരും ഓടി രക്ഷപ്പെടാന്‍ ശ്രമിച്ചെങ്കിലും, പിന്റുവും, ശ്രാവണും ഭക്തരുടെ കയ്യില്‍ അകപ്പെട്ടെന്നും, മര്‍ദനത്തില്‍ അവര്‍ക്ക് ജീവന്‍ നഷ്ടപ്പെട്ടെന്നുമാണ് കമ്മിറ്റിക്കാരുടെ വാദം. 

ALSO READ: മോദിയെ 'മോടി പിടിപ്പിക്കാൻ' 2,586 കോടി; കേന്ദ്രം പരസ്യമുണ്ടാക്കാൻ കോടികൾ കൊടുത്തത് ആർക്കൊക്കെയെന്നത് 'രഹസ്യം'

ആക്രമണത്തില്‍ പരിക്കേറ്റ ഇരുവരെയും, ഉടന്‍ തന്നെ പൊലിസിന് കൈമാറി. തുടര്‍ന്ന് പൊലിസാണ് ഇവരെ പട്‌നയിലെ മെഡിക്കല്‍ കോളജ് ഹോസ്പിറ്റലിലേക്ക് കൊണ്ടുപോയത്. ചികിത്സയിലിരിക്കെ ഇരുവരും മരണപ്പെട്ടെന്നുമാണ് റിപ്പോര്‍ട്ട്. 

ഇരട്ടക്കൊലപാതകത്തില്‍ കേസെടുത്ത പൊലിസ് അന്വേഷണം ആരംഭിച്ചിട്ടുണ്ട്. മരണപ്പെട്ടവരുടെ പോസ്റ്റ് മോര്‍ട്ടം നടപടികള്‍ പൂര്‍ത്തിയായെന്നും, കുറ്റമറ്റ രീതിയില്‍ അന്വേഷണം പൂര്‍ത്തിയാക്കി പ്രതികളെ പിടികൂടുമെന്നും പൊലിസ് നളന്ദ പൊലിസ് സൂപ്രണ്ട് ഭരത് സോണി പറഞ്ഞു. 

അതേസമയം ദിവസക്കൂലിക്ക് ജോലി ചെയ്തിരുന്ന തന്റെ മകന്റെ മരണത്തില്‍ തകര്‍ന്നിരിക്കുകയാണ് പിന്റുവിന്റെ അമ്മ സരോജ ദേവി. പിതാവിന്റെ മരണ ശേഷം കുടുംബത്തിന്റെ അത്താണിയായിരുന്ന യുവാവിനെയാണ് ആള്‍ക്കൂട്ടം തല്ലിക്കൊന്നത്. തന്റെ മകന് നീതി കിട്ടണമെന്നും, കുറ്റക്കാര്‍ക്ക് തക്കതായ ശിക്ഷ ഉറപ്പാക്കണമെന്നും സരോജ ദേവി ആവശ്യപ്പെട്ടു. 

two dalit youths were beaten to death after being accused of theft during a temple festival in rajgir, bihar.