കണ്ണൂര്‍: പയ്യാമ്പലം ബീച്ചില്‍ കടലില്‍ കുളിക്കാനിറങ്ങിയ കര്‍ണാടക സ്വദേശിയെ തിരയില്‍പെട്ട് കാണാതായി. കൊട്ടിയൂര്‍ തീര്‍ഥാടനത്തിനെത്തിയ സംഘത്തിലെ അംഗമാണ് അപകടത്തില്‍പ്പെട്ടത്. തിരയില്‍പെട്ട മറ്റൊരാളെ ലൈഫ്ഗാര്‍ഡുകള്‍ രക്ഷപ്പെടുത്തി.

ഉച്ചയ്ക്ക് 12.30ഓടെയാണ് കര്‍ണാടകയില്‍ നിന്നെത്തിയ നാലംഗ സംഘം പയ്യാമ്പലം ബീച്ചിലെത്തിയത്. കൊട്ടിയൂര്‍ ക്ഷേത്ര ദര്‍ശനത്തിനായി എത്തിയ വിദ്യാര്‍ഥികള്‍ ഉള്‍പ്പെടെയുള്ള സംഘമാണ് കടലില്‍ കുളിക്കാനിറങ്ങിയത്. ഇതിനിടെയാണ് ഒരാള്‍ തിരയില്‍പെട്ട് കാണാതായത്.

ALSO READ: 'സിസ്റ്റം നിസ്സംഗത പാലിച്ചു'; തെന്മല അഭയ കേന്ദ്രത്തിൽ വായോധികമാർ പീഡിപ്പിക്കപ്പെട്ട സംഭവത്തില്‍ സ്വമേധയാ ഇടപെട്ട് ഹൈക്കോടതി 

വിവരം ലഭിച്ചതിനെ തുടര്‍ന്ന് തീരസംരക്ഷണ സേനയുടെ അഞ്ചംഗ സംഘം സ്ഥലത്തെത്തി തിരച്ചില്‍ ആരംഭിച്ചു. കാണാതായ വ്യക്തിക്കായി കടലിലും തീരപ്രദേശങ്ങളിലും വ്യാപക പരിശോധന തുടരുകയാണ്.

ഇന്ന് രാവിലെയും പയ്യാമ്പലത്ത് കടലില്‍ കുളിക്കാനിറങ്ങിയ മറ്റൊരു സംഘം അപകടത്തില്‍പ്പെട്ടിരുന്നു. തിരയില്‍പെട്ട ഒരാളെ ലൈഫ്ഗാര്‍ഡുകള്‍ സമയോചിതമായി രക്ഷപ്പെടുത്തി.

കടല്‍ നിലവില്‍ അതീവ പ്രക്ഷുബ്ധമായ സാഹചര്യത്തിലാണ്. കൊട്ടിയൂര്‍ തീര്‍ഥാടന കാലമായതിനാല്‍ കര്‍ണാടക ഉള്‍പ്പെടെ വിവിധ സംസ്ഥാനങ്ങളില്‍ നിന്നുള്ള തീര്‍ഥാടകരും വിനോദസഞ്ചാരികളും കണ്ണൂരിലെ ബീച്ചുകളിലും മറ്റ് വിനോദസഞ്ചാര കേന്ദ്രങ്ങളിലും എത്തുന്നുണ്ട്.

ലൈഫ്ഗാര്‍ഡുകളും അധികൃതരും സുരക്ഷാ മുന്നറിയിപ്പുകള്‍ നല്‍കുന്നുണ്ടെങ്കിലും പലരും അത് അവഗണിച്ച് കടലില്‍ ഇറങ്ങുന്നതായി പരാതിയുണ്ട്. അപകട സാധ്യത കൂടുതലായതിനാല്‍ ജാഗ്രത പാലിക്കണമെന്ന് അധികൃതര്‍ വീണ്ടും മുന്നറിയിപ്പ് നല്‍കി.

A Karnataka native who entered the sea to bathe at Payyambalam Beach went missing after being caught in the waves. The victim was part of a group that had come for the Kottiyoor pilgrimage. Lifeguards rescued another person who was also caught in the waves.