ന്യൂഡല്‍ഹി: പാസ്‌പോര്‍ട്ട് പൗരത്വം തെളിയിക്കുന്ന രേഖയല്ലെന്ന കേന്ദ്ര വിദേശകാര്യ മന്ത്രാലയത്തിന്റെ പരാമര്‍ശത്തിന് പിന്നാലെ ഉയര്‍ന്ന വിമര്‍ശനങ്ങള്‍ക്കിടെ വിശദീകരണവുമായി കേന്ദ്ര സര്‍ക്കാര്‍ രംഗത്തെത്തി. പാസ്‌പോര്‍ട്ട് പൗരത്വ രേഖയല്ലെന്ന നിലപാട് പുതുതല്ലെന്നും വര്‍ഷങ്ങളായി തുടരുന്നതാണെന്നും സര്‍ക്കാര്‍ വൃത്തങ്ങള്‍ വ്യക്തമാക്കി.

പാസ്‌പോര്‍ട്ട് സേവാ ദിനത്തോടനുബന്ധിച്ച് പുറത്തിറക്കിയ സന്ദേശത്തിലാണ് പാസ്‌പോര്‍ട്ട് ഒരു യാത്രാരേഖ മാത്രമാണെന്ന് വിദേശകാര്യ മന്ത്രാലയം വ്യക്തമാക്കിയത്. ഇതിന് പിന്നാലെ സാമൂഹിക മാധ്യമങ്ങളിലും രാഷ്ട്രീയ രംഗത്തും വ്യാപക വിമര്‍ശനം ഉയര്‍ന്നു.

ALSO READ: പഞ്ചായത്ത് ഫണ്ടില്‍ നിന്ന് 20 ലക്ഷം അമ്മയുടെ അക്കൗണ്ടിലേക്ക് മാറ്റി; ഡി.വൈ.എഫ്.ഐ നേതാവായ താല്‍ക്കാലിക ജീവനക്കാരന്‍ കസ്റ്റഡിയില്‍ 

പാസ്‌പോര്‍ട്ട് പൗരത്വം തെളിയിക്കുന്ന രേഖയല്ലെന്നത് ഇന്നലെയോ ഇന്നോ സ്വീകരിച്ച നിലപാടല്ലെന്നും പന്ത്രണ്ട് വര്‍ഷത്തിലേറെയായി ഇത് തുടരുന്ന കാര്യമാണെന്നും സര്‍ക്കാര്‍ വൃത്തങ്ങള്‍ വ്യക്തമാക്കി. പാസ്‌പോര്‍ട്ട് നിയമം, 1967 പ്രകാരം ചില പ്രത്യേക സാഹചര്യങ്ങളില്‍ ഇന്ത്യന്‍ പൗരന്മാരല്ലാത്തവര്‍ക്കും പാസ്‌പോര്‍ട്ട് നല്‍കാന്‍ വ്യവസ്ഥയുണ്ടെന്നും അവര്‍ ചൂണ്ടിക്കാട്ടി.

2013ല്‍ ബോംബെ ഹൈക്കോടതി പുറപ്പെടുവിച്ച വിധിയിലും പാസ്‌പോര്‍ട്ട് പൗരത്വത്തിനുള്ള നിര്‍ണായക രേഖയല്ലെന്ന് വ്യക്തമാക്കിയിട്ടുണ്ടെന്ന് അധികൃതര്‍ പറഞ്ഞു. കര്‍ശന പരിശോധനകള്‍ക്ക് ശേഷമാണ് പാസ്‌പോര്‍ട്ട് നല്‍കുന്നതെങ്കിലും നിയമപരമായി അത് പൗരത്വത്തിന്റെ അന്തിമ തെളിവായി കണക്കാക്കാനാകില്ലെന്നാണ് വിശദീകരണം.

ഇന്ത്യന്‍ നിയമപ്രകാരം പാസ്‌പോര്‍ട്ട് പ്രധാനമായും അന്താരാഷ്ട്ര യാത്രകള്‍ക്കായി സര്‍ക്കാര്‍ നല്‍കുന്ന ഔദ്യോഗിക യാത്രാരേഖയാണ്. അത് പൗരത്വത്തെ സൂചിപ്പിക്കുന്നുണ്ടെങ്കിലും പൗരത്വം തെളിയിക്കുന്ന സമ്പൂര്‍ണ രേഖയല്ലെന്ന നിലപാടാണ് വിദേശകാര്യ മന്ത്രാലയം ആവര്‍ത്തിച്ചത്.

അതേസമയം, മന്ത്രാലയത്തിന്റെ പ്രസ്താവനയ്‌ക്കെതിരേ നിരവധി പ്രമുഖര്‍ രംഗത്തെത്തി. ഗാനരചയിതാവ് ജാവേദ് അക്തര്‍ വിദേശകാര്യ മന്ത്രാലയത്തിന്റെ നിലപാടിനെ 'അസംബന്ധം' എന്നാണ് വിശേഷിപ്പിച്ചത്. 'പാസ്‌പോര്‍ട്ട് പൗരത്വ രേഖയല്ലെങ്കില്‍ പിന്നെ എന്താണ് പൗരത്വത്തിനുള്ള രേഖ?' എന്ന് മുതിര്‍ന്ന അഭിഭാഷകനും രാജ്യസഭാംഗവുമായ കപില്‍ സിബല്‍ ചോദിച്ചു. വോട്ടര്‍ ഐഡി, ആധാര്‍, പാന്‍ കാര്‍ഡ്, പാസ്‌പോര്‍ട്ട് എന്നിവയൊന്നും പൗരത്വ രേഖയല്ലെങ്കില്‍ സാധാരണക്കാര്‍ക്ക് പൗരത്വം എങ്ങനെ തെളിയിക്കാനാകുമെന്ന് മുതിര്‍ന്ന മാധ്യമപ്രവര്‍ത്തകന്‍ രജ്ദീപ് സര്‍ദേശായിയും സാമൂഹിക മാധ്യമത്തിലൂടെ ചോദിച്ചു.

Amid criticism following the Ministry of External Affairs' remark that a passport is not proof of citizenship, the Central Government has issued a clarification. Government sources stated that the stance that a passport is not a citizenship document is not new and has been in place for years.