കൊച്ചി: പെരുമ്പാവൂരില്‍ പിടികൂടിയ 18 കോടി രൂപ വിലമതിക്കുന്ന ഹൈബ്രിഡ് കഞ്ചാവ് വിദേശത്ത് നിന്ന് കേരളത്തിലെത്തിയതെന്ന് പൊലിസ്. കേസില്‍ അറസ്റ്റിലായ വൈപ്പിന്‍ അറുകാട് സ്വദേശികളായ ആയുഷും ഭാര്യ അനഘയും വന്‍ ലഹരി ശൃംഖലയിലെ പ്രധാന കണ്ണികളാണെന്ന നിഗമനത്തിലാണ് അന്വേഷണം പുരോഗമിക്കുന്നത്.

ഓപ്പറേഷന്‍ തൂഫാന്റെ ഭാഗമായി എറണാകുളം റൂറല്‍ പൊലിസിന്റെ ലഹരിവിരുദ്ധ വിഭാഗമായ ഡാന്‍സാഫ് നടത്തിയ പരിശോധനയിലാണ് സമീപകാലത്തെ ഏറ്റവും വലിയ ഹൈബ്രിഡ് കഞ്ചാവ് വേട്ട നടന്നത്. രഹസ്യ വിവരത്തിന്റെ അടിസ്ഥാനത്തില്‍ ആയുഷ് സഞ്ചരിച്ചിരുന്ന സ്‌കൂട്ടര്‍ തടഞ്ഞുനിര്‍ത്തി പരിശോധിച്ചപ്പോള്‍ 1.25 കിലോഗ്രാം ഹൈബ്രിഡ് കഞ്ചാവ് കണ്ടെത്തി.

ALSO READ: സി.ജെ.പി പ്രതിഷേധത്തിനിടെ പ്രവര്‍ത്തകന് മര്‍ദനം;  കര്‍ശന നടപടിയാവശ്യപ്പെട്ട് നേതൃത്വം 

തുടര്‍ന്ന് നടത്തിയ ചോദ്യം ചെയ്യലിലാണ് പെരുമ്പാവൂര്‍ തെക്കുംഭാഗം കുന്നുവഴിയില്‍ വാടകയ്ക്ക് എടുത്ത ഫ്‌ലാറ്റിനെക്കുറിച്ചുള്ള വിവരം ലഭിച്ചത്. ഫ്‌ലാറ്റില്‍ നടത്തിയ പരിശോധനയില്‍ 16.50 കിലോഗ്രാം ഹൈബ്രിഡ് കഞ്ചാവും പിടിച്ചെടുത്തു. ഇതോടെ ആകെ പിടിച്ചെടുത്ത കഞ്ചാവിന്റെ അളവ് 18 കിലോ ആയി. തുടര്‍ന്ന് ആയുഷിന്റെ ഭാര്യ അനഘയേയും പൊലിസ് അറസ്റ്റ് ചെയ്തു.

കോടികള്‍ വിലവരുന്ന ലഹരിമരുന്ന് സൂക്ഷിക്കാനും വിതരണം നടത്താനുമായി രണ്ടാഴ്ച മുമ്പാണ് ദമ്പതികള്‍ ഫ്‌ലാറ്റ് വാടകയ്ക്ക് എടുത്തതെന്നാണ് പൊലിസിന്റെ കണ്ടെത്തല്‍. പ്രതികള്‍ക്ക് മുന്‍പ് ക്രിമിനല്‍ പശ്ചാത്തലമുണ്ടോയെന്നും അന്വേഷണ സംഘം പരിശോധിക്കുന്നുണ്ട്.

പിടിച്ചെടുത്തത് വിപണിയില്‍ ലഭിക്കുന്ന മുന്തിയ ഇനം ഹൈബ്രിഡ് കഞ്ചാവാണെന്നും ഇത് രാജ്യത്തിന് പുറത്തുനിന്ന് കടത്തിക്കൊണ്ടുവന്നതാണെന്നും എറണാകുളം റേഞ്ച് ഡിഐജി ജി.എച്ച്. യതീഷ് ചന്ദ്ര പറഞ്ഞു. ലഹരിമരുന്നിന്റെ ഉറവിടം, കേരളത്തിലെത്തിച്ച മാര്‍ഗം, പിന്നില്‍ പ്രവര്‍ത്തിച്ച സംഘങ്ങള്‍ എന്നിവ സംബന്ധിച്ച് നിര്‍ണായക വിവരങ്ങള്‍ ലഭിച്ചതായും അദ്ദേഹം വ്യക്തമാക്കി.

തെക്കുകിഴക്കന്‍ ഏഷ്യന്‍ രാജ്യങ്ങളില്‍ നിന്നാണ് ഹൈബ്രിഡ് കഞ്ചാവ് എത്തിച്ചതെന്നാണ് പൊലിസ് വൃത്തങ്ങള്‍ സൂചിപ്പിക്കുന്നത്. ആയുഷും അനഘയും വലിയൊരു ലഹരി സിന്‍ഡിക്കറ്റിന്റെ ഭാഗമാണെന്നും ഇടനിലക്കാരായി പ്രവര്‍ത്തിച്ച് മൊത്തവിതരണം നടത്തിയിരുന്നുവെന്നുമാണ് അന്വേഷണ സംഘത്തിന്റെ വിലയിരുത്തല്‍.

ലഹരി വിതരണക്കാര്‍, മൊത്തക്കച്ചവടക്കാര്‍, ചെറുകിട വില്‍പ്പനക്കാര്‍, താഴെത്തട്ടിലെ വിതരണക്കാര്‍ എന്നിവരെ ഉള്‍ക്കൊള്ളുന്ന വലിയ ശൃംഖലയിലെ പ്രധാന കണ്ണികളാണ് ദമ്പതികളെന്ന് പൊലിസ് കരുതുന്നു. കേസില്‍ കൂടുതല്‍ അറസ്റ്റ് ഉണ്ടാകാനിടയുണ്ടെന്നും അന്വേഷണം വ്യാപിപ്പിച്ചതായും അധികൃതര്‍ അറിയിച്ചു.

Police said the 18 kg hybrid ganja worth ₹18 crore seized in Perumbavoor was smuggled into Kerala from abroad. The investigation is progressing with the finding that arrested Vypin Arukad natives Ayush and his wife Anagha are key links in a major drug network.