തൃശൂര്‍: തെരുവ് നായ ശല്യം രൂക്ഷമായതിനെ തുടര്‍ന്ന് സ്‌കൂളിന് അവധി നല്‍കി അധികൃതര്‍. തൃശൂര്‍ ചൂണ്ടല്‍ ഗവണ്‍മെന്റ് യുപി സ്‌കൂളിനാണ് ഇന്ന്  അടിയന്തരമായി അവധി പ്രഖ്യാപിച്ചത്. അവധി ദിവസങ്ങള്‍ക്ക് ശേഷം സ്‌കൂള്‍ തുറന്ന ഇന്ന്, കാംപസിലെ വാഹനങ്ങള്‍ പാര്‍ക്ക് ചെയ്യുന്ന ഷെഡില്‍ തെരുവ് നായ പ്രസവിച്ചു കിടക്കുന്നതായി ശ്രദ്ധയില്‍പ്പെടുകയായിരുന്നു. അഞ്ച് നായക്കുട്ടികളുള്ളതിനാല്‍ അക്രമസ്വഭാവം കാണിക്കുന്ന നായയെ അവിടെ നിന്നും പെട്ടെന്ന് മാറ്റാന്‍ സാധിക്കാത്ത സാഹചര്യത്തിലാണ് മുന്‍കരുതലെന്നോണം സ്‌കൂള്‍ അടച്ചിടാന്‍ തീരുമാനിച്ചത്.

സ്‌കൂള്‍ പരിസരത്തും കുട്ടികള്‍ വരുന്ന വഴിയിലും തെരുവുനായ ശല്യം അതിരൂക്ഷമാണെന്ന് നാട്ടുകാരും രക്ഷിതാക്കളും പരാതിപ്പെടുന്നു. കഴിഞ്ഞ മാസം 23ന് ഇതേ സ്‌കൂളിലെ ഏഴാം ക്ലാസ് വിദ്യാര്‍ത്ഥിക്ക് സ്‌കൂളിലേക്ക് വരുന്ന വഴിയില്‍ തെരുവ് നായയുടെ കടിയേറ്റിരുന്നു.

പിന്നീട് ഈ നായ ചാവുകയും, പരിശോധനയില്‍ ഇതിന് പേവിഷ ബാധയുണ്ടായിരുന്നതായി സ്ഥിരീകരിക്കുകയും ചെയ്തിരുന്നു. ഈയൊരു പശ്ചാത്തലത്തില്‍ കുട്ടികളുടെ സുരക്ഷ മുന്‍നിര്‍ത്തിയാണ് സ്‌കൂള്‍ മാനേജ്‌മെന്റ് ഇന്ന് അവധി പ്രഖ്യാപിച്ചത്. അടിയന്തരമായി തെരുവുനായ ശല്യത്തിന് പരിഹാരം കാണണമെന്നാണ് രക്ഷിതാക്കളുടെ ആവശ്യം.

A holiday was declared for Chundal Government UP School in Thrissur today after a stray dog gave birth to five puppies in the school's vehicle shed, posing a threat to the safety of the students.