ന്യൂജേഴ്‌സി: 2026 ഫിഫ ലോകകപ്പിൽ സ്വീഡനെ തകർത്ത് ഫ്രാൻസ് മുന്നേറിയപ്പോൾ ഫുട്ബോൾ ലോകം ഉറ്റുനോക്കുന്നത് മൈക്കൽ ഒലീസെ എന്ന 24-കാരനായ ഫ്രഞ്ച് വിങ്ങറിലേക്കാണ്. സ്വീഡനെതിരായ മത്സരത്തിൽ ഫ്രാൻസിന്റെ രണ്ട് ഗോളുകൾക്ക് വഴിയൊരുക്കിയതോടെ (അസിസ്റ്റ്) ഈ നൂറ്റാണ്ടിലെ അപൂർവ്വമായൊരു ചരിത്രനേട്ടമാണ് ഒലീസ് സ്വന്തമാക്കിയത്. നടന്നു കൊണ്ടിരിക്കുന്ന ലോകകപ്പിൽ ഒലീസെയുടെ ആകെ അസിസ്റ്റുകളുടെ എണ്ണം ഇതോടെ അഞ്ചായി (5) ഉയർന്നു.

മത്സരത്തിന്റെ 53-ാം മിനിറ്റിൽ ബ്രാഡ്‌ലി ബാർക്കോളോ നേടിയ ഗോളിനും, 74-ാം മിനിറ്റിൽ നായകൻ കിലിയൻ എംബാപ്പെ നേടിയ രണ്ടാം ഗോളിനും പന്ത് എത്തിച്ചു നൽകിയത് ഒലീസെയുടെ മാന്ത്രിക കാലുകളായിരുന്നു. ടൂർണമെന്റിലെ ആദ്യ മത്സരത്തിൽ ഇറാഖിനെ 3-0 ന് തോൽപ്പിച്ചപ്പോഴും രണ്ട് ഗോളുകൾക്ക് ഒലീസെ വഴിയൊരുക്കിയിരുന്നു.

മറഡോണയ്ക്കൊപ്പം; മുന്നിൽ ഇനി പെലെ മാത്രം

ഒരു ലോകകപ്പ് പതിപ്പിൽ 5 അസിസ്റ്റുകൾ നേടുന്ന 21-ാം നൂറ്റാണ്ടിലെ ആദ്യ കളിക്കാരനാണ് മൈക്കൽ ഒലീസെ. ഇതോടെ ഡീഗോ മറഡോണ ഉൾപ്പെടെയുള്ള ഇതിഹാസങ്ങളുടെ റെക്കോർഡിനൊപ്പം താരം പങ്കാളിയായി. 1970 ലോകകപ്പിൽ 6 അസിസ്റ്റുകൾ നൽകിയ ബ്രസീൽ ഇതിഹാസം പെലെ മാത്രമാണ് ഇനി ഒലീസെയ്ക്ക് മുന്നിലുള്ളത്.

ഒരു ഫിഫ ലോകകപ്പിൽ ഏറ്റവും കൂടുതൽ അസിസ്റ്റുകൾ നേടിയവർ:

പ്ലെയർ-രാജ്യം-അസിസ്റ്റുകൾ-വർഷം

1. പെലെ-ബ്രസീൽ-6-1970
2. റോബർട്ട് ഗഡോച്ച-പോളണ്ട്-5-1974
3. പിയറി ലിറ്റ്ബാർസ്കി-പശ്ചിമ ജർമ്മനി-5-1982
4. ഡീഗോ മറഡോണ-അർജന്റീന-5-1986
5. തോമസ് ഹാസ്ലർ-ജർമ്മനി-5-1994
6. മൈക്കൽ ഒലീസെ-ഫ്രാൻസ്-5-2026

ഫ്രാൻസിന് ടൂർണമെന്റിൽ ഇനി മത്സരങ്ങൾ ബാക്കിയുള്ളതിനാൽ പെലെയുടെ ഈ ചരിത്ര റെക്കോർഡ് തകർക്കാൻ ഒലീസിന് സുവർണ്ണാവസരമുണ്ട്. ലോകകപ്പ് ചരിത്രത്തിൽ ഏറ്റവും കൂടുതൽ അസിസ്റ്റുകൾ നൽകിയ ലയണൽ മെസ്സിയുടെയും മറഡോണയുടെയും റെക്കോർഡിനും (8 അസിസ്റ്റുകൾ വീതം) ഒലീസ് തൊട്ടരികിലെത്തി.

ഫ്രഞ്ച് ചരിത്രത്തിലും ഒലീസ് ഒന്നാമൻ

ലോകകപ്പിൽ വെറും നാല് മത്സരങ്ങൾ മാത്രം കളിച്ചിട്ടും, ലോകകപ്പ് ചരിത്രത്തിൽ ഫ്രാൻസിനായി ഏറ്റവും കൂടുതൽ അസിസ്റ്റുകൾ നൽകുന്ന കളിക്കാരൻ എന്ന റെക്കോർഡ് ഇനി ഒലീസിന് സ്വന്തം. അന്റോയിൻ ഗ്രീസ്മാൻ (19 മത്സരങ്ങൾ), ഒസ്മാൻ ഡെംബെലെ (15 മത്സരങ്ങൾ), കിലിയൻ എംബാപ്പെ (18 മത്സരങ്ങൾ) എന്നിവരെയെല്ലാം പിന്നിലാക്കിയാണ് ഒലീസിന്റെ ഈ സ്വപ്നതുല്യമായ കുതിപ്പ്.

റൗണ്ട് ഓഫ് 32 കടമ്പ കടന്ന ഫ്രാൻസ് ഇനി ജൂലൈ 4 ശനിയാഴ്ച ഫിലാഡൽഫിയയിൽ നടക്കുന്ന ക്വാർട്ടർ ഫൈനലിൽ പരാഗ്വെയെ നേരിടും. ജർമ്മനിയെ അട്ടിമറിച്ചെത്തുന്ന പരാഗ്വെയ്ക്കെതിരെയും ഒലീസ് ഈ മിന്നും ഫോം തുടരുമെന്ന പ്രതീക്ഷയിലാണ് ഫ്രഞ്ച് ആരാധകർ.