കണ്ണൂര്‍ : കണ്ണൂര്‍ സെന്‍ട്രല്‍ ജയിലില്‍ തടവുകാര്‍ തമ്മില്‍ ഏറ്റുമുട്ടി. തടയാനെത്തിയ പൊലിസുകാര്‍ ഉള്‍പ്പടെ 11 പേര്‍ക്ക് മര്‍ദ്ദനമേറ്റു. സെന്‍ട്രല്‍ ജയിലിലെ ഒന്നാം ബ്ലോക്കിലാണ് ഏറ്റുമുട്ടലുണ്ടായത്. ഉദ്യോഗസ്ഥരും തടവുകാരും ഉള്‍പ്പെടെ 11 പേര്‍ക്ക് പരുക്കേറ്റു.

തടവുകാര്‍ തമ്മില്‍ ഇന്നലെ ഏറ്റുമുട്ടിയിരുന്നു തുടര്‍ന്ന് ജലാലുദ്ദീന്‍ സ്വയം ബ്ലേഡ് ഉപയോഗിച്ച് ശരീരത്തില്‍ മുറിവ് ഉണ്ടാക്കിയിരുന്നു. ഇത് അറിഞ്ഞ് ജയില്‍ ഉദ്യോഗസ്ഥര്‍ സംഭവ സ്ഥലത്തെത്തിയിരുന്നു. തുടര്‍ന്ന് കാപ്പ കേസ് പ്രതികള്‍ ഉദ്യോഗസ്ഥര്‍ക്കെതിരെ തിരിഞ്ഞ് ആക്രമണം നടത്തുകയായിരുന്നു. സംഭവത്തില്‍ 11 പേര്‍ക്ക് പരുക്കേറ്റു. അതേസമയം ആരുടേയും പരുക്ക് ഗുരുതരമല്ല.

സംഭവത്തില്‍ പ്രിസണ്‍ ഓഫീസര്‍ ഉള്‍പ്പെടെ അഞ്ച് പൊലീസ് ഉദ്യോഗസ്ഥര്‍ക്കും ആറ് തടവുകാര്‍ക്കുമാണ് പരുക്കേറ്റിട്ടുള്ളത്. പരുക്കേറ്റവരെല്ലാം ചികിത്സ തേടി, ആരുടേയും പരുക്ക് സാരമല്ല എന്ന് ജയില്‍ അധികൃതര്‍ വ്യക്തമാക്കി. കാപ്പ തടവുകാരുള്‍പ്പെടെ പലപ്പോഴും ജയിലില്‍ പ്രകോപനം സൃഷ്ടിക്കാറുണ്ടെന്നും ചില നിയന്ത്രണങ്ങള്‍ കര്‍ശനമാക്കുമ്പോഴാണ് ഇത്തരത്തില്‍ സംഘര്‍ഷങ്ങള്‍ ഉണ്ടാകാറുള്ളത് എന്നും അധികൃതര്‍ പറഞ്ഞു.