മെക്സിക്കോ സിറ്റി: 2026 ഫിഫ ലോകകപ്പിൽ ഇക്വഡോറിനെ തകർത്ത് മെക്സിക്കോ പ്രീ ക്വാർട്ടറിലേക്ക് യോഗ്യത നേടിയതിന് പിന്നാലെ ഫുട്ബോൾ ലോകത്ത് പുതിയൊരു ചരിത്രം കുറിക്കപ്പെട്ടിരിക്കുകയാണ്. മെക്സിക്കോയുടെ 17 വയസ്സുകാരൻ മിഡ്ഫീൽഡർ ഗിൽബെർട്ടോ മോറയാണ് ബ്രസീൽ ഇതിഹാസം പെലെയുടെ റെക്കോർഡിനൊപ്പം ചരിത്ര പുസ്തകത്തിൽ ഇടംപിടിച്ചത്.

ചൊവ്വാഴ്ച നടന്ന റൗണ്ട് ഓഫ് 32 പോരാട്ടത്തിൽ ഇക്വഡോറിനെതിരെ ആദ്യ ഇലവനിൽ കളത്തിലിറങ്ങിയതോടെ, ലോകകപ്പ് ചരിത്രത്തിൽ ഒരു നോക്കൗട്ട് മത്സരം സ്റ്റാർട്ട് ചെയ്യുന്ന ഏറ്റവും പ്രായം കുറഞ്ഞ രണ്ടാമത്തെ കളിക്കാരൻ എന്ന പദവി മോറ സ്വന്തമാക്കി. മത്സരദിവസം 17 വയസ്സും 259 ദിവസവുമായിരുന്നു മെക്സിക്കൻ കൗമാരക്കാരന്റെ പ്രായം. 1958 ലെ ഫിഫ ലോകകപ്പിൽ 17 വയസ്സും 239 ദിവസവും പ്രായമുള്ളപ്പോൾ കളിച്ച് ഒന്നാമതെത്തിയ സാക്ഷാൽ പെലെയ്ക്ക് തൊട്ടുപിന്നിലാണ് ഇപ്പോൾ മോറയുടെ സ്ഥാനം.

മത്സരത്തിലുടനീളം തകർപ്പൻ പ്രകടനം കാഴ്ചവെച്ച മോറയെ നിറഞ്ഞ കൈയ്യടികളോടെയാണ് എസ്റ്റാഡിയോ ആസ്ടെക്ക സ്റ്റേഡിയത്തിലെ പതിനായിരക്കണക്കിന് ആരാധകർ സ്വീകരിച്ചത്.

"മത്സരത്തിന്റെ അവസാന ഘട്ടത്തിൽ മോറ പൂർണ്ണമായും തളർന്നുപോയിരുന്നു, എങ്കിലും അവൻ ധീരനായ ഒരു കുട്ടിയാണ്. അവനടക്കം ടീമിലെ എല്ലാ കളിക്കാരും മൈതാനത്ത് കഠിനമായി പ്രയത്നിച്ചു എന്ന്," മെക്സിക്കൻ പരിശീലകൻ ഹാവിയർ അഗ്വിറെ മത്സരശേഷം പറഞ്ഞു.

അവസാനിപ്പിച്ചത് 40 വർഷത്തെ നീണ്ട ശാപം!

ഇക്വഡോറിനെ എതിരില്ലാത്ത രണ്ട് ഗോളുകൾക്ക് തകർത്താണ് സഹ-ആതിഥേയരായ മെക്സിക്കോ അവസാന 16-ലേക്ക് യോഗ്യത ഉറപ്പാക്കിയത്. ലോകകപ്പ് നോക്കൗട്ട് ഘട്ടത്തിൽ ഒരു വിജയത്തിനായി മെക്സിക്കോ കാത്തിരുന്ന 40 വർഷത്തെ നീണ്ട ശാപത്തിനാണ് ഇതോടെ വിരാമമായത്. സ്വന്തം നാട്ടിൽ നടന്ന 1986 ലോകകപ്പിൽ ബൾഗേറിയയെ തോൽപ്പിച്ചതിന് ശേഷം ആദ്യമായാണ് മെക്സിക്കോ ഒരു ലോകകപ്പ് നോക്കൗട്ട് മത്സരത്തിൽ വിജയം സ്വന്തമാക്കുന്നത്.

മത്സരത്തിന്റെ ആദ്യ പകുതിയിൽ തന്നെ ജൂലിയൻ ക്വിനോൺസ്, റൗൾ ജിമെനെസ് എന്നിവർ നേടിയ ഗോളുകളാണ് മെക്സിക്കോയ്ക്ക് ആധികാരിക വിജയം സമ്മാനിച്ചത്. ആസ്ടെക്ക സ്റ്റേഡിയത്തിലെ ഗാലറികളെ ആവേശം കൊള്ളിച്ച പ്രകടനത്തോടെ മെക്സിക്കോ തങ്ങളുടെ ലോകകപ്പ് പ്രതീക്ഷകൾ സജീവമാക്കി.

പ്രീ ക്വാർട്ടറിൽ വമ്പന്മാർ കാത്തിരിക്കുന്നു

പ്രീ ക്വാർട്ടർ ഉറപ്പിച്ച മെക്സിക്കോയ്ക്ക് അടുത്ത റൗണ്ടിൽ കടുത്ത പോരാട്ടമായിരിക്കും നേരിടേണ്ടി വരിക. ഇംഗ്ലണ്ടോ അതോ ഡെമോക്രാറ്റിക് റിപ്പബ്ലിക് ഓഫ് കോംഗോയോ ആയിരിക്കും പ്രീ ക്വാർട്ടറിൽ മെക്സിക്കോയുടെ എതിരാളികൾ. ടൂർണമെന്റിലെ തങ്ങളുടെ അടുത്ത നിർണായക മത്സരത്തിനായി മെക്സിക്കോ വീണ്ടും ആസ്ടെക്ക സ്റ്റേഡിയത്തിലേക്ക് തന്നെ മടങ്ങിയെത്തും.