കോഴിക്കോട്: കാഫിര്‍ സ്‌ക്രീന്‍ഷോട്ട് കേസില്‍ അന്യായമായി പ്രതിയാക്കിയതിനെതിരെ നിയമപോരാട്ടത്തിനൊരുങ്ങി എംഎസ്എഫ് നേതാവ് മുഹമ്മദ് കാസിം. പ്രതിയാക്കിയ അന്വേഷണ സംഘത്തിനെതിരെയും, വ്യാജ പരാതി നല്‍കിയവര്‍ക്കെതിരെയും പ്രോസിക്യൂഷന്റെ വീഴ്ച്ചക്കെതിരെയും നിയമപരമായി നീങ്ങാനാണ് തീരുമാനം. 

കേസില്‍ പ്രതിയാക്കി രണ്ടുവര്‍ഷമാണ് കാസിമിനെ അന്വേഷണ സംഘം വേട്ടയാടിയത്. തന്നെ എന്തിനാണ് പ്രതിയാക്കിയതെന്ന് ചോദിക്കാനുള്ള അവകാശം ഇരയ്ക്ക് ഉണ്ടെന്ന് കാസിമിന്റെ അഭിഭാഷകന്‍ അഫ്‌നാസ് പ്രതികരിച്ചു. 

കേസില്‍ കഴിഞ്ഞ ദിവസമാണ് കാസിമിനെ കുറ്റവിമുക്തനാക്കിയത്. കാസിമിന്റെ മൊബൈല്‍ ഫോണുകള്‍ ഫോറന്‍സിക് പരിശോധനയ്ക്ക് അയച്ചിരുന്നു. വിവാദമായ സ്‌ക്രീന്‍ഷോട്ട് നിര്‍മിച്ചത് ഈ ഫോണുകളില്‍ നിന്നല്ലെന്ന് നേരത്തെ കണ്ടെത്തിയിരുന്നു. 

കഴിഞ്ഞ സര്‍ക്കാരിന്റെ കാലത്ത് അന്വേഷണം നടത്തിയ സംഘം കാഫിര്‍ സ്‌ക്രീന്‍ഷോട്ടിന് പിന്നില്‍ കാസിമാണെന്നാണ് പ്രചരിപ്പിച്ചത്. തുടര്‍ന്ന് നിയമനടപടി സ്വീകരിക്കുകയും ചെയ്തിരുന്നു. എന്നാല്‍ യുഡിഎഫ് സര്‍ക്കാര്‍ അധികാരത്തിലെത്തിയതിന് പിന്നാലെ പ്രത്യേക അന്വേഷണ സംഘം രൂപീകരിച്ച് കേസ് വീണ്ടും അന്വേഷിക്കുകയും, സിപിഎം, ഡിവൈഎഫ് ഐ നേതാക്കള്‍ക്ക് കേസില്‍ പങ്കുണ്ടെന്ന് കണ്ടെത്തുകയും ചെയ്തിരുന്നു. ഇതോടെയാണ് പ്രതിപ്പട്ടികയില്‍ നിന്ന് ഒഴിവാക്കാം എന്ന് ചൂണ്ടിക്കാട്ടി പ്രത്യേക അന്വേഷണ സംഘം കോടതിക്ക് റിപ്പോര്‍ട്ട് നല്‍കിയത്.