പാലക്കാട്: കെ.എസ്.ആര്‍.ടി.സി പ്രിയദര്‍ശിനി ബസില്‍ നിന്ന് തെറിച്ചുവീണ് കണ്ടക്ടര്‍ക്ക് പരുക്കേറ്റു. ആലത്തൂര്‍ വാനൂര്‍ സ്വദേശി മുഹമ്മദിനാണ് പരുക്കേറ്റത്. ചൊവ്വാഴ്ച രാവിലെ 9 മണിയോടെയായിരുന്നു സംഭവം.

ഒറ്റപ്പാലത്ത് നിന്ന് വടക്കഞ്ചേരി വഴി പാണ്ടാംകോടേക്ക് സര്‍വീസ് നടത്തുന്ന ബസ് ആയക്കാട് മന്നത്ത് എത്തിയപ്പോഴാണ് അപകടമുണ്ടായത്. ബസിന്റെ ഡോര്‍ തുറന്ന് മുഹമ്മദ് പുറത്തേക്ക് തെറിച്ചുവീഴുകയായിരുന്നു. അപകടസമയത്ത് ബസില്‍ 130ലധികം യാത്രക്കാര്‍ ഉണ്ടായിരുന്നതായി വിവരം.

തിരക്കിനെ തുടര്‍ന്ന് ആയക്കാട് ബസ് സ്റ്റോപ്പില്‍ വാഹനം നിര്‍ത്തിയിരുന്നില്ല. സ്റ്റോപ്പില്‍ നിന്ന് ഏകദേശം 20 അടി മുന്നിലായാണ് മുഹമ്മദ് റോഡിലേക്ക് വീണത്. പരുക്കേറ്റ മുഹമ്മദിനെ ഇരട്ടക്കുളം സ്വകാര്യ ആശുപത്രിയില്‍ പ്രവേശിപ്പിച്ചു.

അപകടത്തിന് തൊട്ടുമുമ്പ് പുളിങ്കുട്ടം ബസ് സ്റ്റോപ്പില്‍ നിന്ന് മുന്‍വശത്തെ ഡോറിലൂടെ ഇറങ്ങിയ കണ്ടക്ടര്‍ പിന്നിലെ ഡോറിലൂടെ ബസില്‍ കയറി ഡോര്‍ അടച്ചതായാണ് യാത്രക്കാര്‍ പറയുന്നത്. തിരക്കിനെ തുടര്‍ന്ന് ഡോര്‍ അബദ്ധത്തില്‍ തുറന്നതാകാം കണ്ടക്ടര്‍ പുറത്തേക്ക് തെറിച്ചുവീഴാന്‍ കാരണമെന്നാണ് പ്രാഥമിക നിഗമനം. സംഭവത്തില്‍ കൂടുതല്‍ അന്വേഷണം നടക്കുകയാണ്.

A KSRTC Priyadarshini bus conductor was injured after falling from the bus.The injured is Mohammed from Vanur, Alathur. The incident happened on Tuesday around 9 AM.