അപകടം നടന്നതിന് തൊട്ടുപിന്നാലെ മുൻകരുതലിന്റെ ഭാഗമായി 1,2,3 പ്ലാറ്റ്‌ഫോമുകളിലെ വൈദ്യുതി വിതരണം വിച്ഛേദിച്ചു. ഇതോടെയാണ് ഈ ട്രാക്കുകളിൽ ട്രെയിൻ ഗതാഗതം തടസപ്പെട്ടത്. അപകട സമയത്ത് ഉച്ചയ്ക്ക് രണ്ടിന് പുറപ്പെടേണ്ട കോഴിക്കോട്-കണ്ണൂർ പാസഞ്ചർ ട്രെയിൻ രണ്ടാം പ്ലാറ്റ്‌ഫോമിൽ നിർത്തിയിട്ടിരുന്നെങ്കിലും യാത്രക്കാർ ഉണ്ടായിരുന്നില്ല. സമീപത്തുണ്ടായിരുന്ന ശുചീകരണ തൊഴിലാളികൾ കെട്ടിടം വീഴുന്ന ശബ്ദം കേട്ട് ഓടിരക്ഷപ്പെട്ടു. ഷീറ്റുകൾക്കു മുകളിൽ കല്ലുകൾ പതിക്കുന്ന ശബ്ദം കേട്ടതോടെ പ്ലാറ്റ്‌ഫോമിലുണ്ടായിരുന്ന ജീവനക്കാർ ഓടി മാറിയതിനാൽ അവർക്കും പരുക്കേറ്റില്ല. കെട്ടിടാവശിഷ്ടങ്ങൾക്കിടയിൽ ആരെങ്കിലും കുടുങ്ങിയിട്ടുണ്ടോയെന്ന് സി.സി.ടി.വി ദൃശ്യങ്ങൾ ഉൾപ്പെടെ പരിശോധിച്ച് ഉറപ്പുവരുത്തിയിരുന്നു

 റെയിൽവേ സ്റ്റേഷനിൽ നവീകരണത്തിന്റെ ഭാഗമായി വൻ നിർമാണ പ്രവർത്തനങ്ങൾ പുരോഗമിക്കുകയാണ്. പൈലിങ് ഉൾപ്പെടെ നടക്കുന്നതിനിടെ കാലപ്പഴക്കമുള്ള കെട്ടിടങ്ങളുടെ സുരക്ഷ ഉറപ്പാക്കണമെന്ന ആവശ്യം നേരത്തേ ഉയർന്നിരുന്നു. കഴിഞ്ഞ ദിവസങ്ങളിലുണ്ടായ കനത്ത മഴയും കെട്ടിടത്തിന്റെ ബലക്ഷയത്തിന് കാരണമായി. സ്റ്റേഷൻ മാസ്റ്ററുടെ ഓഫിസും ആർ.പി.എഫ് ഓഫിസും ഉൾപ്പെടുന്ന പഴയ കെട്ടിടത്തിന്റെ ഭാഗമായ ക്ലോക്ക് ടവറാണ് തകർന്നത്. കെട്ടിടത്തിന്റെ ഈഭാഗം ഇന്നലെ പൊളിക്കാനുള്ള ഒരുക്കങ്ങൾക്കിടെയാണ് സംഭവം. അഗ്‌നിരക്ഷാ സേന, ആർ.പി.എഫ്, പൊലിസ് സേനാംഗങ്ങൾ സ്ഥലത്തെത്തി സ്ഥിതിഗതികൾ നിയന്ത്രിച്ചു. 

കെട്ടിടം തകർന്നതിന് കാരണം കനത്ത മഴയാണെന്നാണ് റെയിൽവേയുടെ വിശദീകരണം. കെട്ടിടം പൊളിച്ചുമാറ്റുന്ന പ്രാഥമിക നടപടികൾ പുരോഗമിക്കുന്നതിനിടെയാണ് തകർന്നതെന്നും റെയിൽവേ അറിയിച്ചു.