ദുബൈ: ദുബൈയിലെ സ്വകാര്യ മേഖലാ തൊഴിലാളികൾക്ക് ഇനി തൊഴിലുടമകൾക്കെതിരായ തൊഴിൽപരാതികൾ DubaiNow ആപ്പ് വഴി നേരിട്ട് നൽകാം. ഡിജിറ്റൽ ദുബൈ (Digital Dubai)യാണ് പുതിയ സേവനം പ്രഖ്യാപിച്ചത്. ദുബൈ പൊലീസിന്റെ "Worker's Voice" സേവനത്തിന്റെ ഭാഗമായാണ് ഈ സൗകര്യം ലഭ്യമാക്കിയത്.

ശമ്പളവുമായി ബന്ധപ്പെട്ട പ്രശ്നങ്ങൾ, ജോലി സാഹചര്യങ്ങൾ, തൊഴിലാളികളുടെ താമസസൗകര്യം, തൊഴിൽസ്ഥലത്തെ ആരോഗ്യ-സുരക്ഷാ മാനദണ്ഡങ്ങൾ എന്നിവയുമായി ബന്ധപ്പെട്ട വ്യക്തിഗതവും കൂട്ടായതുമായ പരാതികൾ തൊഴിലാളികൾക്ക് ഈ സേവനത്തിലൂടെ സമർപ്പിക്കാം.

സർക്കാർ സേവന കേന്ദ്രങ്ങളിൽ നേരിട്ട് പോകേണ്ടതില്ലാതെ DubaiNow ആപ്പിലൂടെ തന്നെ പരാതികൾ ഡിജിറ്റലായി സമർപ്പിക്കാനാകുന്നതാണ് പുതിയ സംവിധാനത്തിന്റെ പ്രധാന പ്രത്യേകത.

ദുബൈ സർക്കാരിന്റെ ഏകീകൃത ഡിജിറ്റൽ സേവന പ്ലാറ്റ്ഫോമായ DubaiNow വഴി 35-ലധികം സർക്കാർ-സ്വകാര്യ സ്ഥാപനങ്ങളുടെ 250-ത്തിലധികം സേവനങ്ങൾ ഇതിനകം ലഭ്യമാണ്. പുതിയ സേവനം തൊഴിലാളികൾക്ക് പരാതിനൽകൽ കൂടുതൽ എളുപ്പവും വേഗത്തിലുമാക്കുമെന്ന് അധികൃതർ അറിയിച്ചു.

English Summary: Private sector workers in Dubai can now submit employment-related complaints against their employers through the DubaiNow app using the new "Worker's Voice" service developed by Dubai Police. The service allows complaints related to wages, working conditions, accommodation, and occupational health and safety to be filed digitally without visiting service centres.