കോഴിക്കോട്: കോഴിക്കോട് റെയില്‍വേ സ്റ്റേഷനിലെ ക്ലോക്ക് ടവര്‍ തകര്‍ന്നതിനെ തുടര്‍ന്നുണ്ടായ ട്രെയിന്‍ ഗതാഗതക്കുരുക്ക് രണ്ടാം ദിവസവും പൂര്‍ണ്ണമായി പരിഹരിക്കാനായില്ല. അപകടത്തില്‍പ്പെട്ട കെട്ടിടത്തിന്റെ അവശിഷ്ടങ്ങളും ബാക്കിഭാഗവും പൊളിച്ചുനീക്കുന്ന ജോലികള്‍ തുടരുന്നതിനാല്‍ സ്റ്റേഷനിലെ രണ്ടും മൂന്നും പ്ലാറ്റ്‌ഫോമുകള്‍ താല്‍ക്കാലികമായി അടച്ചു. നിലവില്‍ ഒന്ന്, നാല് പ്ലാറ്റ്‌ഫോമുകളിലൂടെയുള്ള ട്രാക്കുകളിലൂടെ മാത്രമാണ് ട്രെയിനുകള്‍ കടത്തിവിടുന്നത്.

ഇതുമൂലം മലബാര്‍ മേഖലയിലൂടെയുള്ള നിരവധി സര്‍വീസുകള്‍ വൈകിയാണ് ഓടുന്നത്. കണ്ണൂര്‍ ഭാഗത്തുനിന്നുള്ള പരശുറാം എക്‌സ്പ്രസ്, കണ്ണൂര്‍-കോഴിക്കോട് പാസഞ്ചര്‍, പാലക്കാട് എക്‌സ്പ്രസ്, നേത്രാവതി എക്‌സ്പ്രസ് എന്നിവ ഒരു മണിക്കൂറോളം വൈകി സര്‍വീസ് നടത്തുമ്പോള്‍ വന്ദേഭാരത് എക്‌സ്പ്രസ് മാത്രമാണ് കൃത്യസമയം പാലിക്കുന്നത്. കൂടാതെ, കണ്ണൂര്‍ - കോഴിക്കോട് പാസഞ്ചര്‍ ട്രെയിന്‍ കോഴിക്കോടിന് പകരം വെസ്റ്റ് ഹില്ലില്‍ സര്‍വീസ് അവസാനിപ്പിക്കും. തിരികെ കോഴിക്കോട് - കണ്ണൂര്‍ പാസഞ്ചര്‍ ഉച്ചയ്ക്ക് 2.16ന് വെസ്റ്റ് ഹില്ലില്‍ നിന്നായിരിക്കും പുറപ്പെടുക. ഇത് നഗരത്തിലേക്കുള്ള യാത്രക്കാരെ കടുത്ത ദുരിതത്തിലാക്കും.

ദീര്‍ഘദൂര ട്രെയിനുകള്‍ മണിക്കൂറുകളോളം വൈകും

ലിങ്ക് ട്രെയിനുകള്‍ വൈകിയെത്തിയതിനെ തുടര്‍ന്ന് പ്രമുഖ ദീര്‍ഘദൂര സര്‍വീസുകള്‍ പലതും സമയക്രമം മാറ്റി പുതുക്കി നിശ്ചയിച്ചിട്ടുണ്ട്.

ഇന്നലെ പുറപ്പെടേണ്ടിയിരുന്ന തിരുവനന്തപുരം നോര്‍ത്ത്  ഭാവ്‌നഗര്‍ എക്‌സ്പ്രസ് 16 മണിക്കൂര്‍ വൈകി ഇന്ന് രാവിലെ 7.45നാണ് യാത്ര തിരിച്ചത്.

ഇന്ന് പുലര്‍ച്ചെ പുറപ്പെടേണ്ടിയിരുന്ന എറണാകുളം - പുണെ സൂപ്പര്‍ഫാസ്റ്റ് എക്‌സ്പ്രസ് 10.45 മണിക്കൂര്‍ വൈകി ഉച്ചയ്ക്ക് ഒന്നിനേ പുറപ്പെടൂ.

രാവിലെ പുറപ്പെടേണ്ടിയിരുന്ന തിരുവനന്തപുരം നോര്‍ത്ത്  ഇന്‍ഡോര്‍ സൂപ്പര്‍ഫാസ്റ്റ് എക്‌സ്പ്രസ് 10.5 മണിക്കൂര്‍ വൈകി ഇന്ന് രാത്രി 7.15നായിരിക്കും തിരുവനന്തപുരത്ത് നിന്ന് യാത്ര തിരിക്കുക.

Train schedules across Kerala face massive delays and rescheduling, with some long-distance trains delayed up to 16 hours, as platforms 2 and 3 at Kozhikode railway station remain closed for the demolition of the damaged clock tower building.