പാലക്കാട്: പാലക്കാട് സര്‍ക്കാര്‍ മെഡിക്കല്‍ കോളജ് ഹോസ്റ്റലുകളിലെ കുടിവെള്ളത്തില്‍ മലിനജലം കലരുന്നതായും മാരകമായ ഇകോളി (E. coli) ബാക്ടീരിയയുടെ സാന്നിധ്യമുള്ളതായും കണ്ടെത്തി. ഹോസ്റ്റലുകളില്‍ താമസിക്കുന്ന വിദ്യാര്‍ത്ഥികള്‍ക്ക് കുടിക്കാനും ഭക്ഷണം പാകം ചെയ്യാനുമടക്കം ഉപയോഗശൂന്യമായ ചെളിനനഞ്ഞ വെള്ളമാണ് ലഭിക്കുന്നത്. പൊതുമരാമത്ത് വകുപ്പ് നടത്തിയ അറ്റകുറ്റപ്പണികള്‍ക്കിടയിലെ അപാകത മൂലം കുഴല്‍ക്കിണറിലേക്ക് മലിനജലം ഒലിച്ചിറങ്ങിയതാണ് കടുത്ത ആരോഗ്യപ്രതിസന്ധിക്ക് കാരണമായത്.

ഹോസ്റ്റലിലെ മോശം ജലവിതരണത്തിനെതിരെ കഴിഞ്ഞ ദിവസം വിദ്യാര്‍ത്ഥികള്‍ കടുത്ത പ്രതിഷേധവുമായി രംഗത്തിറങ്ങിയിരുന്നു. ചെളിനിറഞ്ഞ വെള്ളമടങ്ങിയ ബക്കറ്റുകളുമായാണ് വിദ്യാര്‍ത്ഥികള്‍ അധികൃതര്‍ക്ക് മുന്നില്‍ പ്രതിഷേധിച്ചത്. സംഭവം വിവാദമായതോടെ രണ്ടാഴ്ചയ്ക്കുള്ളില്‍ പ്രശ്‌നത്തിന് ശാശ്വത പരിഹാരം കാണുമെന്ന് പിഡബ്ല്യുഡി ഉറപ്പുനല്‍കി. ഇതിന്റെ ഭാഗമായി ഹോസ്റ്റലുകളിലെ കുഴല്‍ക്കിണറുകള്‍ക്ക് ചുറ്റുമുള്ള മണ്ണ് നീക്കം ചെയ്യുമെന്നും അവിടം പൂര്‍ണ്ണമായി കോണ്‍ക്രീറ്റ് ചെയ്ത് മലിനജലം ഇറങ്ങുന്നത് തടയുമെന്നും അധികൃതര്‍ അറിയിച്ചു.

Following intense student protests over muddy water supply, authorities confirmed the presence of E. coli bacteria in Palakkad Medical College hostel's drinking water, prompting the PWD to promise restoration work within two weeks