തിരുവനന്തപുരം: ബസുകളിൽ വിദ്യാര്‍ഥി കണ്‍സെഷന്‍ പ്രായപരിധി 27 വയസാക്കി ഉയര്‍ത്തി മോട്ടോര്‍ വാഹന വകുപ്പ്. നേരത്തെ 24 വയസായിരുന്നു. പ്രായപരിധി ഉയര്‍ത്തിയതിനൊപ്പം വിദ്യാര്‍ഥികളുടെ സഞ്ചാരപരിധി 40 കിലോമീറ്ററായും വര്‍ധിപ്പിച്ചിട്ടുണ്ട്. 
സ്വകാര്യ ബസുകളില്‍ കണ്‍സെഷനെച്ചൊല്ലി വിദ്യാര്‍ഥികളും ജീവനക്കാരും തമ്മില്‍ തര്‍ക്കങ്ങള്‍ പതിവായ പശ്ചാത്തലത്തിലാണ് നടപടി. രാവിലെ 6 മുതല്‍ വൈകിട്ട് 7  വരെ വിദ്യാര്‍ഥികള്‍ക്ക് കണ്‍സെഷന്‍ നിരക്കില്‍ യാത്ര ചെയ്യാം. 
മുഴുവന്‍ സമയ സര്‍ക്കാര്‍ അംഗീകൃത വിദ്യാഭ്യാസ സ്ഥാപനങ്ങളിലെ വിദ്യാര്‍ഥികള്‍ക്ക് മാത്രമായിരിക്കും ആനുകൂല്യം. ക്രാഷ് കോഴ്‌സുകള്‍ ചെയ്യുന്നവര്‍ക്കും പാര്‍ട് ടൈം വിദ്യാര്‍ഥികള്‍ക്കും ആനുകൂല്യം ലഭിക്കില്ലെന്നും മോട്ടോര്‍ വാഹന വകുപ്പ് അറിയിച്ചു. 
കണ്‍സെഷന്‍ വിതരണത്തിലെ സുതാര്യത ഉറപ്പാക്കാന്‍ നടപടികള്‍ പൂര്‍ണമായും ഓണ്‍ലൈന്‍ വഴിയാക്കും. 'MVD leads' എന്ന മൊബൈല്‍ ആപ്പ് വഴിയാണ് വിദ്യാര്‍ഥികള്‍ കണ്‍സെഷനായി അപേക്ഷിക്കേണ്ടത്. ആദ്യഘട്ടത്തില്‍ വിദ്യാഭ്യാസ സ്ഥാപനങ്ങള്‍ 'MVD leads' ആപ്പില്‍ രജിസ്റ്റര്‍ ചെയ്യണം. 
മോട്ടോര്‍ വാഹന വകുപ്പ് പരിശോധന നടത്തി ഇതിന് അപ്രൂവല്‍ നല്‍കും. തുടര്‍ന്ന് വിദ്യാര്‍ഥികള്‍ക്ക് ആപ്പ് വഴി കണ്‍സെഷനായി അപേക്ഷിക്കാം. അപേക്ഷിക്കുന്ന സ്ഥാപനത്തിന് ആപ്പ് വഴി തന്നെ ഇതിന്റെ അറിയിപ്പ് ലഭിക്കും. അപേക്ഷകന്‍ അവിടെ പഠിക്കുന്ന വിദ്യാര്‍ഥി തന്നെയെന്ന് മോട്ടോര്‍ വാഹന വകുപ്പ് ഉറപ്പുവരുത്തിയ ശേഷമായിരിക്കും കണ്‍സെഷൻ അനുവദിക്കുക.