അബുദബി: യുഎഇയിൽ ഇന്നും അതിശക്തമായ ചൂട് അനുഭവപ്പെടുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. രാജ്യത്തിന്റെ ഉൾപ്രദേശങ്ങളിൽ പരമാവധി താപനില 48 ഡിഗ്രി സെൽഷ്യസ് വരെ ഉയരുമെന്നാണ് പ്രവചനം. എന്നാൽ ചൊവ്വാഴ്ച മുതൽ ചില പ്രദേശങ്ങളിൽ താപനിലയിൽ നേരിയ കുറവ് അനുഭവപ്പെടുമെന്നത് ആശ്വാസവാർത്തയാണ്.

ഇന്ന് പൊതുവെ തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥയായിരിക്കും. കിഴക്കൻ, തെക്കൻ മേഖലകളിൽ ഉച്ചയ്ക്ക് ശേഷം മേഘങ്ങൾ രൂപപ്പെടുകയും ചിലയിടങ്ങളിൽ ഇടിമിന്നലോടുകൂടിയ സംവഹന മേഘങ്ങൾ വികസിക്കാനും സാധ്യതയുണ്ട്.

തെക്കുകിഴക്കൻ മുതൽ വടക്കുപടിഞ്ഞാറൻ ദിശയിലേക്ക് മണിക്കൂറിൽ കിലോമീറ്റർ വരെ വേഗത്തിൽ കാറ്റ് വീശും. ചില സമയങ്ങളിൽ ഇത് 35 കിലോമീറ്റർ വരെ ശക്തിപ്പെടാനിടയുള്ളതിനാൽ തുറന്ന പ്രദേശങ്ങളിൽ പൊടിക്കാറ്റിനും സാധ്യതയുണ്ട്. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കും.

തീരപ്രദേശങ്ങളിലും ദ്വീപുകളിലും 39°C മുതൽ 45°C വരെയും ഉൾപ്രദേശങ്ങളിൽ 42°C മുതൽ 48°C വരെയും പർവതപ്രദേശങ്ങളിൽ 33°C മുതൽ 38°C വരെയുമാണ് ഇന്നത്തെ താപനില പ്രതീക്ഷിക്കുന്നത്.

നാളെ ഭാഗികമായി മേഘാവൃതമായ കാലാവസ്ഥ തുടരുമെങ്കിലും താപനില നേരിയ തോതിൽ ഉയരാൻ സാധ്യതയുണ്ട്. ചൊവ്വാഴ്ച മുതൽ തീരപ്രദേശങ്ങളിൽ താപനില ക്രമേണ കുറയുകയും വടക്കൻ മേഖലകളിൽ മേഘാവൃത സാഹചര്യം തുടരുകയും ചെയ്യും.

ചൊവ്വ, ബുധൻ ദിവസങ്ങളിൽ വടക്കുപടിഞ്ഞാറൻ കാറ്റ് മണിക്കൂറിൽ 40 കിലോമീറ്റർ വരെ ശക്തിപ്പെടാൻ സാധ്യതയുള്ളതിനാൽ ചില പ്രദേശങ്ങളിൽ പൊടിക്കാറ്റ് അനുഭവപ്പെടും. അറേബ്യൻ ഗൾഫിൽ കടൽ ചില സമയങ്ങളിൽ പ്രക്ഷുബ്ധമാകാനും സാധ്യതയുണ്ട്.

ബുധനാഴ്ചയും വ്യാഴാഴ്ചയും താപനിലയിൽ നേരിയ ഇടിവ് തുടരുമെന്ന് കാലാവസ്ഥാ കേന്ദ്രം അറിയിച്ചു. 

English summary : The UAE is set for generally fair to partly cloudy weather on Sunday, with clouds expected to develop over eastern and southern areas, where they could become convective, according to the National Centre of Meteorology (NCM).