തിരുവനന്തപുരം: ഡിവൈഎഫ്‌ഐയുടെ പൊതിച്ചോറ് വിതരണവുമായി ബന്ധപ്പെട്ട വിവാദങ്ങളില്‍ വീണ്ടും വിശദീകരണവുമായി ആരോഗ്യമന്ത്രി കെ. മുരളീധരന്‍. ആരുടെയും ഭക്ഷണം മുടക്കാന്‍ ശ്രമിച്ചിട്ടില്ലെന്നും ആലപ്പുഴ മെഡിക്കല്‍ കോളജിലെ സ്ഥലം കൈയേറ്റത്തിനെതിരെ ലഭിച്ച പരാതിയുടെ അടിസ്ഥാനത്തിലാണ് ഇടപെട്ടതെന്നും അദ്ദേഹം വ്യക്തമാക്കി.

മെഡിക്കല്‍ കോളജിന്റെ വികസന പ്രവര്‍ത്തനങ്ങള്‍ തടസ്സപ്പെടുത്തും വിധം ചില സംഘടനകള്‍ സംഘടിതമായി സ്ഥലം കൈയേറുന്നതാണ് പ്രശ്‌നമായത്. ആശുപത്രി വികസന സമിതിയുടെ തീരുമാനപ്രകാരം നിലവില്‍ ആലപ്പുഴയില്‍ മാത്രമാണ് കമ്മ്യൂണിറ്റി കിച്ചന്‍ നടപ്പാക്കുന്നത്. മറ്റ് ആശുപത്രികളിലേക്ക് ഇത് വ്യാപിപ്പിക്കുന്ന കാര്യം ഇപ്പോള്‍ പരിഗണനയിലില്ലെന്നും മന്ത്രി പറഞ്ഞു.

നിയമവിരുദ്ധമായി പ്രവര്‍ത്തിച്ച ലാബിനെതിരെ നടപടിയെടുത്തതാണ് ഇപ്പോഴത്തെ എതിര്‍പ്പുകള്‍ക്ക് കാരണം. ആശുപത്രിയില്‍ ആളുകള്‍ക്ക് ആഹാരം നല്‍കുന്നതിന് യാതൊരു തടസ്സവുമില്ല. പരനാറി, ചെറ്റ തുടങ്ങിയ അധിക്ഷേപ പദങ്ങള്‍ താന്‍ ഉപയോഗിച്ചിട്ടില്ലെന്നും ഈ വിഷയത്തില്‍ ഡിവൈഎഫ്‌ഐയും കെ. സുരേന്ദ്രനും ഒരേ നിലപാടാണ് സ്വീകരിക്കുന്നതെന്നും മന്ത്രി കൂട്ടിച്ചേര്‍ത്തു.

Health Minister K. Muraleedharan clarified that his objection in the DYFI Pothichoru controversy was directed at land encroachment at Alappuzha Medical College, not the distribution of food to patients.

ഭക്ഷണം വിതരണം ചെയ്യുന്നതിന് സര്‍ക്കാര്‍ എതിരല്ലെന്ന് വ്യക്തമാക്കിക്കൊണ്ട് മന്ത്രി മുന്‍പും ഫേസ്ബുക്കില്‍ കുറിപ്പ് പങ്കുവച്ചിരുന്നു. പാവപ്പെട്ടവര്‍ക്ക് ഭക്ഷണം ലഭ്യമാക്കുക എന്നതിനാണ് പ്രാധാന്യമെന്നും ആഹാരത്തിന് രാഷ്ട്രീയമോ ജാതിയോ മതമോ ഇല്ലെന്നും അദ്ദേഹം ചൂണ്ടിക്കാട്ടി. ആശുപത്രിയിലെ മുഴുവന്‍ രോഗികള്‍ക്കും കൂട്ടിരിപ്പുകാര്‍ക്കും കൃത്യമായി ഭക്ഷണം ലഭ്യമാക്കുക എന്ന ലക്ഷ്യത്തോടെയാണ് ആലപ്പുഴയില്‍ കമ്മ്യൂണിറ്റി കിച്ചന്‍ പദ്ധതിക്ക് തുടക്കമിടുന്നത്.