ന്യൂഡൽഹി: പരീക്ഷാ ക്രമക്കേടുകളുമായി ബന്ധപ്പെട്ട് ഉയർന്ന വിദ്യാർഥി പ്രക്ഷോഭം ശക്തമാകുന്നതിനിടെ, നാഷനൽ ടെസ്റ്റിങ് ഏജൻസിയിൽ (എൻ.ടി.എ) വൻ അഴിച്ചുപണിയുമായി കേന്ദ്ര സർക്കാർ. എൻ.ടി.എയിലെ 47ഓളം ഉദ്യോഗസ്ഥരെ ഒറ്റയടിക്ക് പിരിച്ചുവിട്ടതായാണ് പുറത്തുവരുന്ന വിവരം. വീഴ്ച വരുത്തിയ ചില ഉദ്യോഗസ്ഥർക്കെതിരെ ക്രിമിനൽ നടപടികൾ സ്വീകരിച്ചേക്കുമെന്നും സൂചനയുണ്ട്.

രാജ്യത്തെ പരീക്ഷാ സമ്പ്രദായം കൂടുതൽ സുതാര്യവും കാര്യക്ഷമവുമാക്കുന്നതിന്റെ ഭാഗമായാണ് നടപടിയെന്നാണ് മുതിർന്ന ഉദ്യോഗസ്ഥരുടെ വിശദീകരണം. അടുത്ത ഒരു മാസത്തിനുള്ളിൽ നിർണായക പരിഷ്കാരങ്ങൾ എൻ.ടി.എയിൽ നടപ്പിലാക്കും. ഏജൻസിയുടെ ഔട്ട്‌സോഴ്‌സിങ് രീതികളിലും പ്രവർത്തന ശൈലിയിലും കാതലായ മാറ്റങ്ങൾ വരുത്തും. വിദഗ്ധ സമിതി സമർപ്പിക്കുന്ന ശുപാർശകളുടെ അടിസ്ഥാനത്തിലാകും പുതിയ പരിഷ്കാരങ്ങൾ. ചോദ്യപേപ്പർ ചോർച്ചയും മറ്റ് അട്ടിമറികളും പൂർണമായി ഒഴിവാക്കുകയാണ് കേന്ദ്ര സർക്കാറിന്റെ ലക്ഷ്യം. നിലവിൽ നീറ്റ്, ജെ.ഇ.ഇ, സി.യു.ഇ.ടി അടക്കം ഇരുപതോളം ദേശീയതല പ്രവേശന പരീക്ഷകൾ നടത്തുന്നത് എൻ.ടി.എയാണ്.

അതേസമയം, ക്രമക്കേടുകളുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന ആവശ്യം കേന്ദ്ര സർക്കാർ തള്ളി. മന്ത്രിയുടെ രാജി നിലവിൽ സർക്കാറിന്റെ പരിഗണനയിലില്ലെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. രാജിവെക്കുക എന്നത് എളുപ്പമുള്ള കാര്യമാണെന്നും എന്നാൽ അത് ഉത്തരവാദിത്തങ്ങളിൽ നിന്നുള്ള ഒളിച്ചോട്ടമാകുമെന്നുമാണ് സർക്കാർ വൃത്തങ്ങളുടെ നിലപാട്. ജനവിധി മാനിച്ചുതന്നെ ചുമതലകൾ പൂർത്തിയാക്കാനാണ് സർക്കാർ ലക്ഷ്യമിടുന്നത്.

എന്നാൽ, ധർമേന്ദ്ര പ്രധാന്റെ രാജിക്കായി പ്രതിഷേധക്കാർ സമ്മർദം ശക്തമാക്കിയിട്ടുണ്ട്. വിഷയത്തിൽ നാളെ ഉച്ചയോടെ അന്തിമ തീരുമാനം അറിയിക്കണമെന്ന് സി.ജെ.പി നേതാക്കൾ കേന്ദ്ര മന്ത്രിമാരുമായി നടത്തിയ കൂടിക്കാഴ്ചയിൽ ആവശ്യപ്പെട്ടു. വിദ്യാഭ്യാസ മന്ത്രിയുടെ രാജി, പ്രതിഷേധത്തിൽ ജീവൻ പൊലിഞ്ഞ വിദ്യാർഥികളുടെ കുടുംബങ്ങൾക്ക് നഷ്ടപരിഹാരം നൽകുക, സമരം ചെയ്ത വിദ്യാർഥികൾക്കെതിരെയെടുത്ത എഫ്.ഐ.ആറുകൾ പിൻവലിക്കുക എന്നീ ആവശ്യങ്ങളാണ് സി.ജെ.പി മുന്നോട്ടുവെച്ചത്. രാജി ഒഴികെയുള്ള ആവശ്യങ്ങളിൽ സർക്കാർ അനുകൂല നിലപാടാണ് സ്വീകരിച്ചത്. മന്ത്രിയുടെ രാജിയുടെ കാര്യത്തിൽ നാളെ വ്യക്തത വരുത്താമെന്ന് സർക്കാർ പ്രതിനിധികൾ അറിയിച്ചിട്ടുണ്ട്.

Amid ongoing student protests and intense scrutiny over competitive exam paper leak controversies, the National Testing Agency (NTA) terminated the services of 47 officials as part of a major overhaul. The central government confirmed that legal and criminal proceedings are also set to be initiated against some of the officials. Despite widespread opposition and student protests demanding accountability, top government sources affirmed that Union Education Minister Dharmendra Pradhan will not resign.