നാദാപുരം: പരിസര മലിനീകരണത്തിന്റെ പേരില്‍ പഞ്ചായത്ത് അടച്ചുപൂട്ടല്‍ നോട്ടിസ് നല്‍കിയ കെട്ടിടം ഉടമ തുറന്നു. ഇതേതുടര്‍ന്ന്, സ്ഥലത്തെത്തിയ പഞ്ചായത്തധികൃതര്‍ വീണ്ടും അടച്ചുപൂട്ടല്‍ നോട്ടിസ് നല്‍കി കെട്ടിടം പൂട്ടിച്ചു.
കല്ലാച്ചി ടാക്‌സി സ്റ്റാന്‍ഡിനു സമീപത്തെ ഇതരസംസ്ഥാന തൊഴിലാളികള്‍ താമസിക്കുന്ന കെട്ടിടമാണു പഞ്ചായത്തിന്റെ മാര്‍ഗനിര്‍ദേശങ്ങള്‍ ലംഘിച്ചതിനു കഴിഞ്ഞ ദിവസം ഹെല്‍ത്ത് ഇന്‍സ്‌പെക്ടര്‍ അടങ്ങുന്ന സംഘം നോട്ടിസ് നല്‍കി പൂട്ടാന്‍ ഉത്തരവു നല്‍കിയത്. ഇവിടെ വാടകയ്ക്കു താമസിക്കുന്നവര്‍ പൊതുസ്ഥലങ്ങളില്‍ മാലിന്യം തള്ളുന്നതു രൂക്ഷമായതോടെയാണ് പഞ്ചായത്ത് നടപടിയെടുത്തത്. എന്നാല്‍ കെട്ടിടത്തോടു ചേര്‍ന്നു പ്രവര്‍ത്തിക്കുന്ന കോഴി സ്റ്റാളിലേക്ക് ഇന്നലെ കോഴിയുമായി ലോഡ് എത്തിയതോടെ തൊഴിലാളികള്‍ കട തുറക്കുകയായിരുന്നു.
സംഭവ സ്ഥലത്തു സംഘര്‍ഷം രൂപപ്പെട്ടതോടെ പൊലിസും സ്ഥലത്തെത്തിയിരുന്നു.