ചെറുവത്തൂര്‍: സര്‍ക്കാര്‍ പ്രഖ്യാപിച്ച അഞ്ചുകിലോ സൗജന്യ അരി വിതരണവുമായി ബന്ധപ്പെട്ട് അധ്യാപകര്‍ വട്ടം ചുറ്റുന്നു. മാവേലി സ്റ്റോറുകളില്‍ എത്തിയാല്‍ അരി സ്റ്റോക്കില്ല എന്ന മറുപടി നല്‍കി ജീവനക്കാര്‍ ഇപ്പോഴും പലയിടങ്ങളിലും   അധ്യാപകരെ മടക്കി അയക്കുകയാണ്.
അതേസമയം ഉച്ചഭക്ഷണത്തിനുള്ള അരിയില്‍ മിച്ചം വന്ന അരി ചില വിദ്യാലയങ്ങളില്‍ സൗജന്യ അരിയായി വിതരണം ചെയ്യുന്നതും പ്രതിസന്ധി സൃഷ്ടിക്കുന്നു. സമീപ വിദ്യാലയങ്ങള്‍ ഇത്തരത്തില്‍ അരി വിതരണം നടത്തുമ്പോള്‍ അരി സ്റ്റോക്കില്ലാത്ത വിദ്യാലയങ്ങളിലെ അധ്യാപകര്‍ രക്ഷിതാക്കളോട് മറുപടി പറയാന്‍ പാടുപെടുകയാണ്. ഓണാവധിക്ക് മുന്നേ അരി ലഭിക്കുമെന്നായിരുന്നു ആദ്യ അറിയിപ്പ്. ഇതനുസരിച്ച് അന്നുമുതല്‍ മാവേലി സ്റ്റോര്‍ കയറി ഇറങ്ങി നിരാശയോടെ മടങ്ങുകയാണ് അധ്യാപകര്‍. സ്‌കൂള്‍ തുറക്കുന്ന ദിവസം അരിവിതരണം പൂര്‍ത്തിയാക്കി വിവരം ബന്ധപ്പെട്ട ഉപജില്ലാ വിദ്യാഭ്യാസ ഓഫീസില്‍ അറിയിക്കണമെന്ന് പ്രധാനാധ്യാപകര്‍ക്ക് നിര്‍ദേശം ലഭിച്ചിരുന്നു. എന്നാല്‍ അതും നടന്നില്ല. അരി എത്തിച്ച് അത് അഞ്ചു കിലോ വീതം തൂക്കി നല്‍കുക എന്നത് വലിയ അധ്വാനമാണ്. കൂടുതല്‍ കുട്ടികളുള്ള വിദ്യാലയങ്ങളില്‍ ഒരു ദിവസം മുഴുവന്‍ പരിശ്രമിച്ചാലും അരി വിതരണം പൂര്‍ത്തിയാക്കാന്‍ സാധിക്കാറില്ല. അഞ്ചു കിലോ അരി കുട്ടികള്‍ക്ക് ഒറ്റയ്ക്ക് വീട്ടിലെത്തിക്കാന്‍ പ്രയാസമാണ്. അതിനാല്‍ രക്ഷിതാക്കളെത്തിയാണ് അരി വാങ്ങിയിരുന്നത്. ഓണപരീക്ഷ കഴിഞ്ഞ് വിളിച്ചു ചേര്‍ക്കുന്ന ക്ലാസ് പി.ടി.എ യോഗങ്ങളില്‍ രക്ഷിതാക്കള്‍ എത്തുമ്പോള്‍ അരി വിതരണം ചെയ്യാം എന്ന കണക്കുകൂട്ടലിലായിരുന്നു അധ്യാപകര്‍.
എന്നാല്‍ ഇന്ന് എല്ലാ വിദ്യാലയങ്ങളിലും ക്ലാസ് പി.ടി.എ യോഗങ്ങള്‍ അവസാനിക്കും. ഇന്നലെ കാലിക്കടവിലെ മാവേലി സ്റ്റോറില്‍ എത്തിയ ചില അധ്യാപകര്‍ നീലേശ്വരം ഡിപ്പോയില്‍ ബന്ധപ്പെട്ടപ്പോള്‍ രണ്ടു ദിവസം കൂടി കാത്തുനില്‍ക്കൂ എന്ന മറുപടിയാണ് ലഭിച്ചത്. അരിയെപ്പോ കിട്ടും മാഷേ എന്ന് കുട്ടികള്‍ ചോദിക്കുമ്പോള്‍ കൈമലര്‍ത്താനേ അധ്യാപകര്‍ക്ക് കഴിയുന്നുള്ളൂ.