മട്ടാഞ്ചേരി: കരകൗശല ശാലയിലെത്തിയ വിദേശ യുവതിയെ മാനഭംഗപ്പെടുത്താന്‍ ശ്രമിച്ച കേസില്‍ കാശ്മീര്‍ യുവാവിനെ ഫോര്‍ട്ടുകൊച്ചി പൊലിസ് അറസ്റ്റ് ചെയ്തു. കാശ്മീര്‍ ശ്രീനഗര്‍ സ്വദേശിയും ഫോര്‍ട്ടുകൊച്ചി പട്ടാളം ദേശത്ത് ദ്രോണാചാര്യക്ക് സമീപം വാടകയ്ക്ക് താമസിക്കുന്ന ജാവേദ് അഹമ്മദ് റത്തേറി(27)നെയാണ് എസ്.ഐ.സുരേഷ് ടുറിസം പൊലിസ് എസ്.ഐ അബ്ദുള്‍ റഷീദ് എന്നിവര്‍ ചേര്‍ന്ന് അറസ്റ്റ് ചെയ്തത്. ഫോര്‍ട്ടുകൊച്ചി ബാസ്റ്റണ്‍ റോഡില്‍ ക്യൂറിയോ ക്രാഫ്റ്റ്‌സ് എന്ന കടയില്‍ വച്ചാണ് അപമാനശ്രമം നടന്നത്. ഞായറാഴ്ച വൈകിട്ട് കടയിലെത്തിയ ഇംഗ്ലണ്ട് സ്വദേശിനിയെ ജാവേദ് അപമാനിച്ചതായുള്ള പരാതിയെ തുടര്‍ന്ന് പൊലിസ് കേസ് എടുക്കുകയായിരുന്നു.പ്രതിയെ ഇന്ന് കോടതിയില്‍ ഹാജരാക്കും.