ന്യൂഡല്‍ഹി: പാക് അധീന കശ്മിരിലെ ഭീകര കേന്ദ്രങ്ങള്‍ക്കു നേരെയുള്ള ആക്രമണ വിവരം സൈന്യം വാര്‍ത്താസമ്മേളനത്തിലൂടെ പരസ്യമാക്കിയതിനു പിന്നാലെ ഇന്നലെ വൈകീട്ട് നാലിന് നോര്‍ത്ത് ബ്ലോക്കില്‍ കേന്ദ്ര ആഭ്യന്തരമന്ത്രി രാജ്‌നാഥ് സിങിന്റെ അധ്യക്ഷതയില്‍ സര്‍വകക്ഷി യോഗം ചേര്‍ന്നു.
കേന്ദ്രമന്ത്രിമാരും വിവിധ പാര്‍ട്ടി പ്രതിനിധികളും പങ്കെടുത്തു. പാര്‍ലമെന്ററി കാര്യമന്ത്രി വെങ്കയ്യ നായിഡു സൈനിക നീക്കം സംബന്ധിച്ച വിശദാംശങ്ങള്‍ വിവരിച്ചു. കേന്ദ്രമന്ത്രിമാരായ മനോഹര്‍ പരീക്കര്‍, സുഷമാ സ്വരാജ്, രാംവിലാസ് പാസ്വാന്‍, ദേശീയ സുരക്ഷാ ഉപദേഷ്ടാവ് അജിത് ദോവല്‍, ബി.ജെ.പി അധ്യക്ഷന്‍ അമിത് ഷാ, ഗുലാംനബി ആസാദ് (കോണ്‍ഗ്രസ്), സീതാറാം യെച്ചൂരി (സി.പി.എം), ശരത് യാദവ് (ജെ.ഡി.യു), ശരത് പവാര്‍ (എന്‍.സി.പി), പ്രിന്‍സിപ്പല്‍ സെക്രട്ടറി നൃപേന്ദ്രസിങ് എന്നിവരും സംബന്ധിച്ചു.
യോഗത്തില്‍പങ്കെടുത്തവരെല്ലാം സൈനിക നീക്കത്തെ പിന്തുണയ്ക്കുകയും തുടര്‍നടപടികള്‍ക്ക് സര്‍ക്കാരിനു പിന്തുണ അറിയിക്കുകയും ചെയ്തു. സൈനിക നീക്കത്തെ അഭിനന്ദിക്കുന്നുവെന്നു പറഞ്ഞ സീതാറാം യെച്ചൂരി കശ്മിര്‍ വിഷയത്തിലെ സമാധാന നീക്കങ്ങള്‍ വഴിമുട്ടരുതെന്ന് ഓര്‍മിപ്പിക്കുകയും ചെയ്തു.