ലക്‌നോ: 56ാമത് ദേശീയ ഓപണ്‍ അത്‌ലറ്റിക്‌സ് ചാംപ്യന്‍ഷിപ്പിന്റെ മൂന്നാം ദിനത്തില്‍ കേരളത്തിനു നിരാശ. മൂന്നാം ദിനത്തില്‍ ഒരു വെങ്കലം മാത്രമാണ് കേരളത്തിനു സ്വന്തമാക്കാന്‍ സാധിച്ചത്. പുരുഷന്‍മാരുടെ ഹൈ ജംപില്‍ കേരളത്തിന്റെ ശ്രീനിത് മോഹനനാണ് വെങ്കലം നേടിയത്. ഈയിനത്തില്‍ ഡല്‍ഹിയുടെ തേജസ്വിന്‍ ശങ്കര്‍ 2,22 മീറ്റര്‍ താണ്ടി സ്വര്‍ണം നേടി. സര്‍വിസസിന്റെ ചേതന്‍ ബി 2.20 മീറ്ററില്‍ വെള്ളിയും ഇതേ ദൂരം താണ്ടി കേരളത്തിന്റെ ശ്രീനിത് വെങ്കലവും നേടുകയായിരുന്നു.
റെയില്‍വേസിന്റെ കുതിപ്പു കണ്ട ദിനത്തില്‍ അവര്‍ നാലു സ്വര്‍ണം സ്വന്തമാക്കി. പോയിന്റ് പട്ടികയില്‍ മൂന്നാം സ്ഥാനത്തുണ്ടായിരുന്ന കേരളത്തെ ഒ.എന്‍.ജി.സി പിന്തള്ളിയതോടെ കേരളം നാലാം സ്ഥാനത്തേക്കിറങ്ങി.
ചാംപ്യന്‍ഷിപ്പിനു ഇന്നു സമാപനം കുറിക്കും. 183.50 പോയിന്റുകളുമായി റെയില്‍വേസ് ബഹുദൂരം മുന്നിലാണ്. 126 പോയിന്റുകളുമായി സര്‍വിസസ് രണ്ടാം സ്ഥാനത്ത്. 56 പോയിന്റുമായി ഒ.എന്‍.ജി.സി മൂന്നാമതും 53 പോയിന്റുമായി കേരളം നാലാമതും നില്‍ക്കുന്നു.