ന്യൂഡല്‍ഹി: പാക് അധിനിവേശ കശ്മിരിലെ മിന്നലാക്രമണത്തില്‍(സര്‍ജിക്കല്‍ സ്‌ട്രൈക്ക്) പ്രധാനമന്ത്രി നരേന്ദ്ര മോദിയെ പ്രകീര്‍ത്തിച്ച് ഡല്‍ഹി മുഖ്യമന്ത്രി അരവിന്ദ് കേജ്‌രിവാള്‍.

സാമൂഹിക മാധ്യമമായ യു ട്യൂബില്‍ പോസ്റ്റ് ചെയ്ത വിഡിയോയിലാണ് പാക് അധിനിവേശ കശ്മിരില്‍ ഇന്ത്യന്‍ സൈന്യം നടത്തിയ ആക്രമണത്തില്‍ പ്രധാനമന്ത്രിക്ക് അഭിനന്ദനം അറിയിച്ചത്.


പ്രധാനമന്ത്രിയുമായി പലകാര്യങ്ങളിലും അഭിപ്രായ വ്യത്യാസം ഉണ്ടെങ്കിലും പാക് അധിനിവേശ കശ്മിരില്‍ ആക്രമണം നടത്താന്‍ മോദി കാണിച്ച ഇച്ഛാശക്തിയെ അഭിനന്ദിക്കുന്നതായി കേജ്‌രിവാള്‍ പറഞ്ഞു.


മിന്നലാക്രമണം നടന്നതിനു ശേഷം പാകിസ്താന്റെ ധൈര്യം ചോര്‍ന്നുപോയി. പാകിസ്താന്‍ ഇന്ത്യക്കെതിരേ നടത്തുന്ന വൃത്തികെട്ട പ്രചാരണം തങ്ങളുടെ തകര്‍ന്നുപോയ പ്രതിച്ഛായ നിലനിര്‍ത്താന്‍ വേണ്ടിയാണ്്. ലോകരാജ്യങ്ങള്‍ക്കു മുന്‍പില്‍ ഇന്ത്യയെ അപമാനിക്കുകയാണ് പാകിസ്താന്‍ ചെയ്യുന്നതെന്നും അദ്ദേഹം കുറ്റപ്പെടുത്തി.