ഗൂഡല്ലൂര്‍: കാവേരി നദീജല വിഷയവുമായി ബന്ധപ്പെട്ട് കര്‍ണാടക-തമിഴ്‌നാട് ട്രാന്‍സ്‌പോര്‍ട്ട് ബസുകള്‍ ഇരു സംസ്ഥാനങ്ങളിലേക്കുമുള്ള സര്‍വിസുകള്‍ നിര്‍ത്തിവച്ചിട്ട് ഇന്നേക്ക് ഒരുമാസം പൂര്‍ത്തിയായി. കര്‍ണാടക തമിഴ്‌നാടിന് വെള്ളം നല്‍കുന്നത് ആരംഭിച്ചെങ്കിലും ബസുകള്‍ ഇപ്പോള്‍ അതിര്‍ത്തിയില്‍ സര്‍വിസ് അവസാനിപ്പിക്കുകയാണ്. നീലഗിരിയിലെ കക്കനഹള്ള അതിര്‍ത്തിവരെയാണ് ബസുകളുടെ സര്‍വിസ്. തുടര്‍ന്ന് യാത്രക്കാര്‍ ഇരു സംസ്ഥാനങ്ങളുടെയും അതിര്‍ത്തി നടന്നാണ് കടക്കുന്നത്. പിന്നീട് ലക്ഷ്യസ്ഥാനത്തേക്ക് ബസുകള്‍ പിടിക്കുകയാണ് യാത്രക്കാര്‍.
കാവേരി പ്രശ്‌നം തുടങ്ങിയതോടെ നിരവധി തമിഴ്‌നാട് രജിസ്‌ട്രേഷന്‍ വാഹനങ്ങളാണ് അക്രമണങ്ങളില്‍ നശിപ്പിക്കപ്പെട്ടത്. ബീച്ചനഹള്ളി ഡാമിലേക്ക് ആയിരങ്ങള്‍ അണിനിരന്ന മാര്‍ച്ചും കര്‍ണാടകയില്‍ നടന്നു. ഈ മാര്‍ച്ചില്‍ അഞ്ചോളം യുവാക്കള്‍ ഡാമില്‍ ചാടി ആത്മഹത്യക്കും ശ്രമിച്ചു. ഇതിനിടെ കര്‍ണാടകക്ക് സുപ്രീംകോടതിയുടെ അന്ത്യശാസനവുമെത്തി. വെള്ളം എത്രയുംപെട്ടെന്ന് നല്‍കിത്തുടങ്ങണമെന്നായിരുന്നു ഉത്തരവ്. ഇതോടെയാണ് പ്രത്യേക നിയമസഭ സമ്മേളനം വിളിച്ച് പ്രമേയം പാസാക്കി വെള്ളം നല്‍കാന്‍ കര്‍ണാടക തീരുമാനമെടുത്തത്. വെള്ളം നല്‍കി തുടങ്ങിയതോടെ കര്‍ണാടക ഏതാണ്ട് ശാന്തമായിട്ടുണ്ട്. തമിഴ്‌നാട്ടിലെ ഹൊസൂര്‍ ജില്ലയിലേക്ക് ബംഗളൂരുവില്‍ നിന്ന് കര്‍ണാടക ബസുകള്‍ സര്‍വിസ് ആരംഭിച്ചിട്ടുണ്ട്. ഉന്നത ഉദ്യോഗസ്ഥരില്‍ നിന്ന് അറിയിപ്പ് ലഭിച്ചാല്‍ തമിഴ്‌നാട് ബസുകളും കര്‍ണാടകയിലേക്ക് സര്‍വിസ് നടത്തുമെന്ന് ട്രാന്‍സ്‌പോര്‍ട്ട് വൃത്തങ്ങള്‍ അറിയിച്ചു.