നാദാപുരം: മാഹിയില്‍ നിന്നു കടത്തുകയായിരുന്ന 190 കുപ്പി വിദേശമദ്യവുമായി യുവാവിനെ നാദാപുരം എക്‌സ്‌സൈസ് സംഘം പിടികൂടി. മടപ്പള്ളി സ്വദേശി സുരേഷാണ് (34) പിടിയിലായത്. എക്‌സൈസ് കമ്മിഷണറുടെ നിര്‍ദേശപ്രകാരം അതിര്‍ത്തി കേന്ദ്രീകരിച്ചുള്ള മദ്യക്കടത്ത് തടയാന്‍ എക്‌സൈസ് നടത്തിവരുന്ന പരിശോധനയ്ക്കിടെയാണ് വില്‍പനക്കായി കൊണ്ടുപോവുകയായിരുന്ന മദ്യവുമായി സുരേഷിനെ നാദാപുരം എക്‌സ്‌സൈസ് ഇന്‍സ്‌പെക്ടര്‍ കെ. ഷിജില്‍കുമാറും സംഘവും പിടികൂടിയത്. കഴിഞ്ഞ ദിവസം രാത്രി വടകര മൂരാട് പാലത്തിന് സമീപം വാഹന പരിശോധന നടത്തുകയായിരുന്നു എക്‌സ്‌സൈസ് സംഘം. സുരേഷ് സഞ്ചരിച്ച സ്‌കൂട്ടറിന് മുന്‍വശത്ത് നാലു പെട്ടികളിലായി അടുക്കിവച്ച നിലയിലായിരുന്നു മദ്യം സൂക്ഷിച്ചിരുന്നത്. എക്‌സ്‌സൈസ് ഉദ്യോഗസ്ഥരായ എ.കെ ശ്രീജിത്ത്, കെ.എന്‍ രാജേഷ് കുമാര്‍, ഡ്രൈവര്‍ പ്രജീഷ് എന്നിവരും പരിശോധനാ സംഘത്തിലുണ്ടായിരുന്നു.