തൊടുപുഴ: ഇന്ന് മുതല്‍ കോട്ടയത്ത് നടക്കുന്ന ജനാധിപത്യ കേരളാ കോണ്‍ഗ്രസ് സംസ്ഥാന സമ്മേളനത്തില്‍ ഇടുക്കി ജില്ലയില്‍ നിന്ന് അയ്യായിരം പ്രവര്‍ത്തകരെ പങ്കെടുപ്പിക്കുമെന്ന് ജില്ലാ പ്രസിഡന്റ് ജോര്‍ജ് അഗസ്റ്റിന്‍ വാര്‍ത്താസമ്മേളനത്തില്‍ അറിയിച്ചു.
കോട്ടയം തിരുനക്കര മൈതാനത്താണ് സമ്മേളനം ചേരുന്നത്. കാര്‍ഷിക മേഖല നേരിടുന്ന നിരവധി പ്രശ്‌നങ്ങള്‍ സമ്മേളനം ചര്‍ച്ച ചെയ്യും. നാളെ നടക്കുന്ന കര്‍ഷക സംഗമം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഒമ്പതിന് സമ്മേളനം സമാപിക്കും.
പാര്‍ട്ടി മെമ്പര്‍ഷിപ് ക്യാമ്പയിന്‍ ഒക്‌ടോബര്‍ 15ന് സമാപിക്കും. ഇതിനോടകം ജില്ലയില്‍ 11,400 പേര്‍ ജനാധിപത്യ കേരള കോണ്‍ഗ്രസില്‍ അംഗങ്ങളായിട്ടുണ്ട്. കൂടുതല്‍ പേരും കേരളാ കോണ്‍ഗ്രസ് എം വിട്ട് വന്നവരാണെന്നും ജോര്‍ജ് അഗസ്റ്റിന്‍ പറഞ്ഞു.
തൊടുപുഴ നിയോജക മണ്ഡലം പ്രസിഡന്റ് എന്‍ വി വര്‍ക്കി, യൂത്ത് ഫ്രണ്ട് സംസ്ഥാന ജനറല്‍ സെക്രട്ടറി സജികുമാര്‍ കാവുവിള, ജോയി പുത്തേട്ട് എന്നിവരും വാര്‍ത്താസമ്മേളനത്തില്‍ പങ്കെടുത്തു.