കൊച്ചി: കോണ്‍ഫെഡറേഷന്‍ ഓഫ് ഇന്ത്യന്‍ യൂണിവേഴ്‌സിറ്റീസ് ഇന്ത്യന്‍ സര്‍വകലാശാലകളിലെ മികച്ച വൈസ് ചാന്‍സലര്‍ക്കായി നല്‍കുന്ന 2016ലെ നാഷണല്‍ എജ്യൂക്കേഷന്‍ എക്‌സലന്‍സ് അവാര്‍ഡ് മഹാത്മാ ഗാന്ധി സര്‍വകലാശാല വൈസ് ചാന്‍സലര്‍ ഡോ. ബാബു സെബാസ്റ്റ്യന് നല്‍കി. അന്തര്‍ദേശീയ അധ്യാപക ദിനത്തോടനുബന്ധിച്ച് കൊല്‍ക്കത്ത സയന്‍സ് സിറ്റി ഓഡിറ്റോറിയത്തില്‍ നടന്ന സമ്മേളനത്തില്‍ ഇന്ത്യയിലെ ജര്‍മ്മന്‍ കോണ്‍സുല്‍ ജനറല്‍ ഡോ. ഒലീഫ് ഇവേഴ്‌സ അവാര്‍ഡ് സമ്മാനിച്ചു.
കോണ്‍ഫെഡറേഷന്‍ ഓഫ് ഇന്ത്യന്‍ യൂണിവേഴ്‌സിറ്റീസ് പ്രസിഡന്റ് ഡോ. പ്രിയരഞ്ജന്‍ ത്രിവേദി അധ്യക്ഷത വഹിച്ച ചടങ്ങില്‍ ത്രിപുര ഗവര്‍ണര്‍ പ്രൊഫ. തഥാഗത റോയ് സമ്മേളനം ഉദ്ഘാടനം ചെയ്തു. നാഷണല്‍ ഇന്‍സ്റ്റിറ്റ്യൂട്ട് ഓഫ് എജ്യൂക്കേഷണല്‍ റിസര്‍ച്ച് ഡയറക്ടര്‍ ഡോ. ഉത്ക്കര്‍ഷ് ശര്‍മ്മ മുഖ്യപ്രഭാഷണം നിര്‍വഹിച്ചു. കോഫെഡറേഷന്‍ ഓഫ് ഇന്ത്യന്‍ യൂണിവേഴ്‌സിറ്റീസ് ജനറല്‍ സെക്രട്ടറി തന്‍മോയ് രുദ്ര, വൈസ് ചാന്‍സലര്‍ ഡോ. ബാബു സെബാസ്റ്റ്യന്‍ എന്നിവര്‍ പ്രസംഗിച്ചു.
ഭാരതത്തിലെ മൂന്‍നിര ശാസ്ത്ര-ഗവേഷണ സ്ഥാപനങ്ങളും സര്‍വ്വകലാശാലകളും ഉള്‍പ്പെടുന്ന ജി-51 ഗ്രൂപ്പില്‍ കേരളത്തില്‍ നിന്നും മഹാത്മാ ഗാന്ധി സര്‍വകലാശാല മാത്രമാണ് അംഗമായിട്ടുള്ളത്.