കൊല്ലം: കോയമ്പത്തൂര്‍ മാതൃകയില്‍ പാരിപ്പള്ളി ഇ.എസ്.ഐ കോര്‍പറേഷന്‍ ആശുപത്രി നിലനിര്‍ത്തണമെന്ന് ഓള്‍ ഇന്ത്യാ ഇ.എസ്.ഐ കോര്‍പറേഷന്‍ എംപ്ലോയീസ് അസോസിയേഷന്‍ സംസ്ഥാന പ്രസിഡന്റ് എ റഹിംകുട്ടി വാര്‍ത്താ സമ്മേളനത്തില്‍ ആവശ്യപ്പെട്ടു.
കോയമ്പത്തൂരില്‍ കോര്‍പറേഷന്‍ മെഡിക്കല്‍കോളജ് സംസ്ഥാന സര്‍ക്കാരിനു കൈമാറിയപ്പോള്‍, ഇ.എസ്.ഐ ആശുപത്രി നിലനിര്‍ത്തിയിരുന്നു. എന്നാല്‍ പാരിപ്പള്ളിയില്‍ മൊത്തത്തില്‍ കൈമാറാനാണ് നീക്കം. ഇതിനെതിരെ അനിശ്ചിതകാല സത്യാഗ്രഹമുള്‍പ്പെടെയുള്ള സമരപരിപാടികള്‍ സംഘടന നടത്തും. പാരിപ്പള്ളി മെഡിക്കല്‍കോളജിനായി വാങ്ങിയ കോടിക്കണക്കിനു രൂപയുടെ ഉപകരണങ്ങള്‍ വാറണ്ടി കാലാവധികഴിഞ്ഞിട്ടും പുറത്തെടുത്തിട്ടില്ല. ഇത്തരത്തില്‍ വന്‍ അഴിമതിയാണ് നടന്നിട്ടുള്ളത്. ഇതിനെക്കുറിച്ചും സമഗ്രമായ അന്വേഷണം നടത്തണമെന്നും റഹിംകുട്ടി ആവശ്യപ്പെട്ടു. മയ്യനാട് ശശികുമാര്‍,എസ് സിദ്ധാര്‍ഥന്‍, ശശികുമാര്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.