കണ്ണൂര്‍: തെലങ്കാനയില്‍ നടക്കുന്ന ദേശീയ ഇന്റര്‍ ക്ലബ് അത്‌ലറ്റിക്ക് മീറ്റില്‍ 5,000 മീറ്റര്‍ നടത്തത്തില്‍ നേട്ടം കൊയ്ത് കണ്ണൂരിലെ താരം. എളയാവൂര്‍ സി.എച്ച്.എം ഹയര്‍ സെക്കന്‍ഡറി സ്‌കൂളിലെ ഒന്‍പതാം തരം വിദ്യാര്‍ഥി മുഹമ്മദ് അഫ്ഷാനാണ് സ്വര്‍ണം നടന്നു നേടിയത്. സ്‌കൂളിലെ കായികാധ്യാപകന്‍ സാദിഖിന്റെ നേതൃത്വത്തില്‍ മികച്ച പരിശീലകരെ ഉള്‍പ്പെടുത്തി കഴിഞ്ഞ രണ്ട് വര്‍ഷമായി ഇവിടത്തെ കുട്ടികള്‍ക്ക് മികച്ച പരിശീലനം നല്‍കുന്നുണ്ട്. മികച്ച കുട്ടികളെ കണ്ടെത്തി അവര്‍ക്ക് സൗജന്യമായി ഭക്ഷണവും താമസ സൗകര്യവും സ്‌കൂള്‍ ഏര്‍പ്പെടുത്തിയിട്ടുണ്ട്. മുഹമ്മദ് അഫ്ഷാന് ഉജ്വല സ്വീകരണം നല്‍കാനുള്ള തയാറെടുപ്പിലാണ് സി.എച്ച്.എമ്മിലെ കുട്ടികളും അധ്യാപക രക്ഷാകര്‍തൃ സമിതിയും.