കണ്ണൂര്‍: നഗരത്തില്‍ സ്ത്രീസുരക്ഷക്കായി സ്ഥാപിച്ച അലാറം പദ്ധതി പാളി. ഇതിന്റെ ഒപ്പമുള്ള കാമറയും കണ്ണടച്ച നിലയിലാണ്. സ്ത്രീ സുരക്ഷയ്ക്ക് മേല്‍നോട്ടം വഹിക്കേണ്ട ജില്ലയിലെ വനിതാ സെല്‍പോലും ഇതൊന്നും അറിയാത്ത മട്ടാണ്.
നഗരത്തില്‍ എത്തുന്ന സ്ത്രീകള്‍ക്കുനേരെ എതെങ്കിലും തരത്തിലുള്ള അതിക്രമമോ പ്രശ്‌നമോ ഉണ്ടായാല്‍ പഴയ ബസ് സ്റ്റാന്‍ഡില്‍ സ്ഥാപിച്ചിട്ടുള്ള അലാറത്തിന്റെ ബട്ടനില്‍ അമര്‍ത്തുകയാണ് ചെയ്യേണ്ടിയിരുന്നത്. ഇതിന്റെ സിഗ്നല്‍ ട്രാഫിക്ക് സ്റ്റേഷനില്‍ എത്തുകയും അലാറമിന്റെ ചുറ്റുവട്ടത്തുള്ള ഭാഗങ്ങളിലെ ചിത്രം സ്‌ക്രീനില്‍ തെളിയുകയും ചെയ്യും.
ഉടന്‍ പൊലിസ് സംഭവ സ്ഥലത്തെത്തും. സ്ത്രീ സുരക്ഷയ്ക്ക് ഏറെ പ്രധാന്യം അര്‍ഹിക്കുന്നതാണെങ്കിലും പദ്ധതി ആദ്യനാളുകളില്‍ തന്നെ പാളിപ്പോകുകയായിരുന്നു. സമൂഹത്തില്‍ സ്ത്രീകള്‍ക്കുണ്ടാകുന്ന അതിക്രമങ്ങള്‍ വര്‍ധിച്ചുവരുന്ന സാഹചര്യത്തിലാണ് സര്‍ക്കാര്‍ പല പദ്ധതികളും ആവിഷ്‌കരിക്കുന്നത്. എന്നാല്‍ പലപ്പോഴും പദ്ധതി പൂര്‍ണമായും നടപ്പാക്കാന്‍ കഴിയുന്നില്ല.