പേരൂര്‍ക്കട: ആഡംബരകാറിലെത്തിയവര്‍ക്ക് സൈഡ് നല്‍കിയില്ലെന്നാരോപിച്ച് അടിപിടിയും സംഘര്‍ഷവും. രണ്ടുപേര്‍ക്ക് പരുക്കേറ്റു. മൂന്നുപേരെ പൊലിസ് കസ്റ്റഡിയിലെടുത്തു.
കഴിഞ്ഞദിവസം അമ്പലമുക്കിന് സമീപത്തായിരുന്നു സംഭവം. നഗരസഭയ്ക്കു വേണ്ടി മാലിന്യങ്ങള്‍ ശേഖരിച്ചു വരികയായിരുന്ന ഹരിതഗ്രാമം പദ്ധതിപ്രവര്‍ത്തകരുടെ വാഹനം ആഡംബര കാറിന് സൈഡ് കൊടുത്തില്ലെന്നാരോപിച്ചാണ് പ്രശ്‌നം ഉണ്ടായത്. കാര്‍ പെട്ടെന്ന് കയറി വന്നപ്പോള്‍ ട്രക്ക് പിന്നോട്ടെടുത്ത് വഴി കൊടുക്കാത്തതാണ് പ്രശ്‌നത്തിന് തുടക്കം. ട്രക്ക് ഒരുപാട് ദൂരം പിറകിലേക്ക് മാറ്റേണ്ടി വരുമെന്നും കാര്‍ അല്‍പ്പദൂരം മാത്രം പിന്നിലേക്ക് എടുത്താല്‍ മതിയെന്നും പറഞ്ഞതാണ് തര്‍ക്കം തുടങ്ങിയത്. കാറിലുണ്ടായിരുന്ന സത്രീകള്‍ ഉള്‍പ്പെടെയുള്ളവര്‍ മോശമായി പെരുമാറിയതായി ഹരിതഗ്രാമം പ്രവര്‍ത്തകര്‍ പറഞ്ഞു. അല്‍പ്പസമയത്തിനു ശേഷം ബൈക്കിലെത്തിയ ചിലര്‍ വണ്ടി തല്ലിപ്പൊട്ടിക്കുകയും യുവാക്കളെ ആക്രമിക്കുകയുമായിരുന്നു.
മലമുകള്‍ സ്വദേശികളായ ടിനു, അജിത് എന്നിവര്‍ക്കാണ് പരുക്കേറ്റത്. ഇവരെ പേരൂര്‍ക്കട ഗവ. ജില്ലാ ആശുപത്രിയില്‍ പ്രവേശിപ്പിച്ചു.സംഭവവുമായി ബന്ധപ്പെട്ട് അമ്പലമുക്ക് സ്വദേശി ദീപു, കൊല്ലം സ്വദേശികളായ അജയകുമാര്‍, പ്രദീപ് എന്നിവരെ പേരൂര്‍ക്കട പൊലിസ് കസ്റ്റഡിയിലെടുത്തു.