സോമവാര്‍പേട്ട: സ്വത്തു തര്‍ക്കത്തെ തുടര്‍ന്ന് പിതാവിന്റെ സഹോദരനെ കൊല്ലാന്‍ ശ്രമം നടത്തിയതായി പരാതി.  
സോമവാര്‍പേട്ടയിലെ വര്‍ഗാലെ ഗ്രാമത്തിലെ ഇഗ്ഗോഡ്‌ലു സ്വദേശിയായ പൂവയ്യയെയാണ് സഹോദരപുത്രന്‍ കുശാലപ്പ കൊല്ലാന്‍ശ്രമിച്ചത്. ഇന്നലെ രാവിലെയാണ് സംഭവം.  പാടത്ത് വച്ച് പൂവയ്യ കുശാലപ്പയുമായി സ്വത്ത് സംബന്ധമായ തര്‍ക്കത്തെ തുടര്‍ന്ന് വാക്കേറ്റം നടത്തിയിരുന്നു. കുപിതനായ കുശാലപ്പ അവിടെ എത്തിയ ഭാര്യ രജനിയുടെ കയ്യിലുണ്ടായിരുന്ന കത്തിയെടുത്ത് പൂവയ്യയെ വെട്ടാന്‍ ശ്രമിക്കുകയായിരുന്നു. അക്രമം തടയാന്‍ മറ്റുതൊഴിലാളികള്‍ ശമിച്ചപ്പോള്‍ അവര്‍ക്ക് നേരെയും കുശാലപ്പ കത്തിവീശി. വിവരമറിഞ്ഞ് എത്തിയ പൂവയ്യയുടെ മറ്റൊരു സഹോദരന്‍ സുബ്ബയ്യയുടെ കയ്യിലെ തോക്ക് വാങ്ങി പൂവയ്യയെ വെടിവച്ചുകൊല്ലാന്‍ ശ്രമിച്ചു. തലനാരിഴക്കാണ് പൂവയ്യ രക്ഷപ്പെട്ടത്. സംഭവത്തില്‍ സോമവാര്‍പേട്ട പൊലിസ് അന്വേഷണം ആരംഭിച്ചു.