ശ്രീനഗര്‍: കശ്മീരിലെ പാംപോറില്‍ സൈന്യവും ഭീകരരുമായുള്ള ഏറ്റുമുട്ടല്‍ അവസാനിച്ചു. ഓപറേഷന്‍ വന്‍ വിജയമായിരുന്നെന്ന് കരസേന മേജര്‍ ജനറല്‍ അറിയിച്ചു. നിരവധി ആയുധങ്ങള്‍ ഭീകരരില്‍നിന്ന് കണ്ടെടുത്തു.

58 മണിക്കൂറിലധികം ആക്രമണം നീണ്ടുനിന്നു.

ഏറ്റുമുട്ടലില്‍ സൈന്യം രണ്ടു ഭീകരരെ വധിച്ചിരുന്നു. തിങ്കളാഴ്ച്ച രാവിലെയാണ് ജമ്മു കശ്മീരിലെ എന്റര്‍പ്രണര്‍ഷിപ്പ് ഡെവലപ്പ്‌മെന്റ് ഇന്‍സ്റ്റിറ്റ്യൂട്ടില്‍ ഭീകരര്‍ അതിക്രമിച്ചു കയറിയത്്.

കെട്ടിടത്തിന് സമീപത്തുകൂടെ ഒഴുകുന്ന ഝലം നദിയിലൂടെ ബോട്ട് മാര്‍ഗമാകാം ഭീകരര്‍ എത്തിയതെന്നാണ് കരുതുന്നത്

കശ്മിരിലെ സംഘര്‍ഷങ്ങളെ തുടര്‍ന്ന് കെട്ടിടം മൂന്ന് മാസമായി അടച്ചിട്ടിരിക്കുകയാണ്. അതിനാല്‍ ഇവിടെ വിദ്യാര്‍ഥികളോ ജീവനക്കാരോ ഉണ്ടായിരുന്നില്ല.

കെട്ടിടത്തില്‍ ഒളിച്ച ഭീകരര്‍ വെടിവെയ്പ്പ് തുടങ്ങിയതോടെയാണ് ഏറ്റുമുട്ടല്‍ ആരംഭിച്ചത്. ഇന്നലെ പുലര്‍ച്ചയോടെ കൂടുതല്‍ സൈനികരെത്തി കടുത്ത ആക്രമണം നടത്തുകയായിരുന്നു.

കെട്ടിടത്തിനു നേരെ സൈന്യം മോട്ടോര്‍ ഷെല്ലുകളും മെഷീന്‍ ഗണ്ണുകളും പ്രയോഗിച്ചിരുന്നു. ആക്രമണത്തില്‍ രണ്ട് സിആര്‍പിഎഫ് ജവാന്‍മാരും ഒരു തദ്ദേശവാസിയും കൊല്ലപ്പെട്ടിരുന്നു.