കയ്പമംഗലം: വളര്‍ന്നു വരുന്ന യുവസമൂഹത്തിനിടയില്‍ മയക്കു മരുന്നിന്റേയും കഞ്ചാവിന്റേയും മദ്യത്തിന്റേയും ഉപയോഗം നിയന്ത്രിക്കാനാവാത്ത നിലയില്‍ വ്യാപിച്ചു കൊണ്ടിരിക്കുന്ന സാഹചര്യത്തില്‍ കയ്പമംഗലം ഗ്രാമപഞ്ചായത്ത് ലഹരി വിമുക്ത ഗ്രാമം കാംപയിയിന്റെ ഭാഗമായി കഞ്ചാവ്, മയക്കുമരുന്ന്, വ്യാജമദ്യ ലോബിക്കെതിരെ ജനകീയ കൂട്ടായ്മയൊരുക്കുന്നു. അമ്മൂമ്മയെ തലക്കടിച്ചു കൊന്ന പേരക്കുട്ടി, ഭാര്യയുടെ കഴുത്തിന് വാക്കത്തി കൊണ്ട് വെട്ടിയ ശേഷം ആത്മഹത്യ ചെയ്ത കുടുംബനാഥന്‍, ഒരു കടുംബത്തിന്റെ ഏക ആശ്രയമായിരുന്ന വിബിന്‍ദാസെന്ന ചെറുപ്പക്കാരന്റെ അടുത്ത കലത്തുണ്ടായ ദാരുണ മരണം ഇതെല്ലാം കയ്പമംഗലം മേഖലയില്‍ കഞ്ചാവ്, മയക്കുമരുന്ന് ലഹരി ഉപയോഗത്തിന് അടിമപ്പെട്ട് ഉണ്ടായിട്ടുള്ള ഞെട്ടിക്കുന്ന ചില സംഭവങ്ങളാണ്. ഇത്തരമൊരു പാശ്ചാത്തലത്തിലാണ് നാടിന്റെ പുരോഗതി ലക്ഷ്യം വെച്ച് കഞ്ചാവ്, മയക്കുമരുന്ന്, വ്യാജമദ്യ ലോബിക്കെതിരെ ഒരു ജനകീയ കൂട്ടായ്മ കെട്ടിപ്പടുക്കാന്‍ ഗ്രാമപഞ്ചായത്ത് അധികൃതര്‍ മുന്നിട്ടിറങ്ങിയത്. ഇതിന്റെ ഭാഗമായി നാളെ വൈകീട്ട് നാലിന് കയ്പമംഗലം കാളമുറിയില്‍ പഞ്ചായത്തിലെ മുഴുവന്‍ ജനങ്ങളേയും അണിനിരത്തി കഞ്ചാവ്, മദ്യ, മയക്കുമരുന്ന് ലോബികള്‍ക്കെതിരെ മനുഷ്യ ചങ്ങല തീര്‍ക്കുകയാണ്. മന്ത്രിമാര്‍, എം.എല്‍.എമാര്‍, മറ്റു ജനപ്രതിനിധികള്‍, രാഷ്ട്രീയ, സാമൂഹിക, കലാ സാംസ്‌കാരിക രംഗങ്ങളിലെ പ്രമുഖ വ്യക്തിത്വങ്ങള്‍, വിദ്യാര്‍ഥികള്‍, കുടുംബശ്രീ പ്രവര്‍ത്തകര്‍, പൊതുപ്രവര്‍ത്തകര്‍ എന്നിവരും പൊതുജനങ്ങള്‍ക്കൊപ്പം മനുഷ്യ ചങ്ങലയില്‍ അണിചേരും. കയ്പമംഗലം ഗ്രാമപഞ്ചായത്ത് പ്രസിഡന്റ് ടി.വി.സുരേഷ്ബാബു, പ്രതിപക്ഷ നേതാവ് സുരേഷ് കൊച്ചുവീട്ടില്‍, സെക്രട്ടറി ഇന്‍ ചാര്‍ജ്ജ് എം.പി.കുമാരി നേതൃത്വം നല്‍കും.