തൃശൂര്‍: ഹൈക്കോടതിയിലെ മാധ്യമ വിലക്ക് പിന്‍വലിക്കുന്ന കാര്യത്തില്‍ ചീഫ് ജസ്റ്റിസും മുഖ്യമന്ത്രിയും നല്‍കുന്ന ഉറപ്പുകള്‍ പാലിക്കപ്പെടാതെ പോകുന്നത് ആശങ്കാവഹമാണെന്നും പ്രശ്‌നം പ്രായോഗികതലത്തില്‍ പരിഹരിക്കാന്‍ സര്‍ക്കാര്‍ ഇടപെടണമെന്നും കേരള പത്രപ്രവര്‍ത്തക യൂണിയന്‍ ജില്ലാ സമ്മേളനം ആവശ്യപ്പെട്ടു. വിലക്കില്ലെന്നു ചീഫ് ജസ്റ്റിസും മുഖ്യമന്ത്രിയും ഉറപ്പു നല്‍കുമ്പോഴും മാധ്യമപ്രവര്‍ത്തകര്‍ക്കു നേരെ അഭിഭാഷകരുടെ ഭീഷണി തുടരുകയാണെന്നും ഇത് ആശാവഹമല്ലെന്നും ജില്ലാ സമ്മേളനം പാസാക്കിയ പ്രമേയത്തില്‍ പറയുന്നു.
1985ലെ വര്‍ക്കിങ് ജേണലിസ്റ്റ് ആക്ട് ഭേദഗതി ചെയ്യണമെന്നും അതില്‍ ഇപ്പോള്‍ ഷോപ്‌സ് ആന്‍ഡ് എസ്റ്റാബ്‌ളിഷ്‌മെന്റ് ആക്ടില്‍ ഉള്‍പ്പെടുത്തിയിരിക്കുന്ന ദൃശ്യമാധ്യമപ്രവര്‍ത്തകരെകൂടി ചേര്‍ത്ത് പരിഷ്‌കരിക്കണമെന്നും പ്രമേയം ആവശ്യപ്പെട്ടു.
ചീഫ് ജസ്റ്റിസും മുഖ്യമന്ത്രിയും ഇടപ്പെട്ടിട്ടുപോലും ഹൈക്കോടതിയില്‍ മാധ്യമപ്രവര്‍ത്തകര്‍ക്ക് പ്രവേശിക്കാനാവുന്നില്ലെന്നത് ആശാവഹമായ കാര്യമല്ലെന്ന് സമ്മേളനം ഉദ്ഘാടനം ചെയ്ത മുന്‍ സംസ്ഥാന ജനറല്‍ സെക്രട്ടറി എന്‍. പത്മനാഭന്‍ അഭിപ്രായപ്പെട്ടു. മാധ്യമ പ്രവര്‍ത്തന മേഖലയിലെ അരക്ഷിതാവസ്ഥയും മാധ്യമ സ്വാതന്ത്ര്യത്തിനു മേലുള്ള കടന്നുകയറ്റവും കയ്യേറ്റശ്രമങ്ങളും ജില്ലാ സമ്മേളനത്തില്‍ ചര്‍ച്ചയായി. ട്രേഡ് യൂണിയന്‍ മേഖലയിലെ പ്രവര്‍ത്തനങ്ങള്‍ സജീവമാക്കണമെന്ന് ആവശ്യമുയര്‍ന്നു.
യൂണിയന്‍ ജില്ലാ പ്രസിഡന്റ് സന്തോഷ് ജോണ്‍ തൂവല്‍ അധ്യക്ഷനായി. സെക്രട്ടറി കെ.സി. അനില്‍കുമാര്‍ റിപ്പോര്‍ട്ട് അവതരിപ്പിച്ചു. ട്രഷറര്‍ രഞ്ജിത്ത് എന്‍.നായര്‍ കണക്കും സംസ്ഥാന കമ്മിറ്റി അംഗം ജോയ് എം. മണ്ണൂര്‍ പ്രമേയവും അവതരിപ്പിച്ചു. വൈസ് പ്രസിഡന്റ് എം. വി. വിനീത സ്വാഗതവും ഫിന്നി ലൂയിസ് നന്ദിയും പറഞ്ഞു. ഇന്നും നാളെയും എറണാകുളം ടൗണ്‍ഹാളില്‍ നടക്കുന്ന സംസ്ഥാന സമ്മേളനത്തില്‍ പരമാവധി അംഗങ്ങളെ പങ്കെടുപ്പിക്കുവാന്‍ തീരുമാനമായി.