ലാഹ്‌ലി: രഞ്ജി ട്രോഫിയില്‍ മധ്യപ്രദേശിനെതിരായ മത്സരത്തില്‍ വെറ്ററന്‍ താരം യുവരാജ് സിങിനു ഉജ്ജ്വല സെഞ്ച്വറി. വിമര്‍ശകരുടെ വായടപ്പിച്ച് പുറത്താകാതെ 164 റണ്‍സുമായാണ് യുവരാജ് തിളങ്ങിയത്. യുവിയുടെ ഇന്നിങ്‌സിന്റെ മികവില്‍ പഞ്ചാബ് ആദ്യ ദിനം മൂന്നിനു 347 എന്ന നിലയിലാണ്. 241 പന്തില്‍ നിന്നു 24 ബൗണ്ടറികളുടെ അകമ്പടിയോടെയായിരുന്നു യുവിയുടെ ശതകം. താരത്തിന്റെ 25ാം ഫസ്റ്റ്ക്ലാസ് സെഞ്ച്വറിയാണിത്.
യുവ താരം ഗുര്‍കീരത് സിങും (101) സെഞ്ച്വറി നേടി യുവിക്കൊപ്പം പുറത്താകാതെ നില്‍ക്കുന്നു.
15 റണ്‍സിനിടെ രണ്ടു വിക്കറ്റുകള്‍ വീണു പഞ്ചാബ് തകര്‍ച്ചയെ അഭിമുഖീകരിച്ച സമയത്താണ് നായകനായ  യുവി ഓപണര്‍ ജിവ്‌ജ്യോത് സിങിനൊപ്പം 61 റണ്‍സും ഗുര്‍കീരതിനൊപ്പം 152 റണ്‍സിന്റേയും കൂട്ടുകെട്ടുണ്ടാക്കി ടീമിനെ രക്ഷിച്ചത്.