കോളിക്കല്‍:  മനുഷ്യന്റെ മഹത്വം മനസിന്റെ മഹത്വമാണെന്ന കണ്‍ഫ്യൂഷ്യസിന്റെ വാക്കുകള്‍  അന്വര്‍ഥമാക്കുന്ന ജീവിതമായിരുന്നു കഴിഞ്ഞ ദിവസം മരണപ്പെട്ട വടക്കുംമുറിയിലെ കാലംകണ്ടി അബ്ദുല്ല മുസ്‌ലിയാരുടേത്. പാണ്ഡിത്യത്തിന്റെ  മുഖമുദ്രയാണ് വിനയം. സ്വജീവിതത്തെ വിനയം കൊണ്ട് അടയാളപ്പെടുത്തിയ പണ്ഡിതനായിരുന്നു അദ്ദേഹം.
പണ്ഡിതവര്യരായിരുന്ന കുട്ടിമുസ്‌ലിയാരുടെയും ഇമ്പിച്ചാലി മുസ്‌ലിയാരുടെയും പ്രിയശിഷ്യനായിരുന്നു അബ്ദുല്ല മുസ്‌ലിയാര്‍. സമസ്തയുടെ സജീവപ്രവര്‍ത്തകനായ  മുസ്‌ലിയാര്‍ നേതൃരംഗത്തെത്താന്‍ ഒരിക്കലും താല്‍പര്യം കാണിക്കാറില്ല. അണിയറയില്‍ നിന്ന് സംഘടനക്ക് ഊര്‍ജം നല്‍കിയ നേതാവായിരുന്നു അദ്ദേഹം.
 അടിവാരം, എകരൂല്‍,പശുക്കടവ്, കുഞ്ഞിക്കുളം, ചമല്‍ എന്നിവിടങ്ങളിലൊക്കെ സേവനം ചെയ്ത അദ്ദേഹത്തിന് വലിയ സൗഹൃദവലയം തന്നെയുണ്ടായിരുന്നു. വിനയവും ലാളിത്യവും നിറഞ്ഞ  പെരുമാറ്റത്തിലൂടെ പരിചയപ്പെടുന്നവരുടെയെല്ലാം മനസില്‍ അദ്ദേഹം ഇടം നേടി.  പ്രാര്‍ഥനകള്‍ക്കിടയില്‍ കണ്ണുകള്‍ നിറഞ്ഞൊഴുകുക പതിവായിരുന്നു.
ജില്ലക്കകത്തും  പുറത്തും വിദേശത്തുമൊക്കെയായി പരന്നുകിടക്കുന്ന വലിയ ശിഷ്യസമ്പത്തുണ്ട് അബ്ദുല്ല മുസ്‌ലിയാര്‍ക്ക്. അവരില്‍ പലരും മരണം വരെ മുസ്‌ലിയാരുമായി മികച്ച ബന്ധം പുലര്‍ത്തിയിരുന്നു.
കൊടുവള്ളി മണ്ഡലം ജംഇയ്യത്തുല്‍ ഉലമയുടെ വൈസ് പ്രസിഡന്റായിരുന്നു അബ്ദുല്ല മുസ്‌ലിയാര്‍. മഹാന്മാരെക്കുറിച്ചുള്ള ഓര്‍മപ്പെടുത്തലുകള്‍ വര്‍ത്തമാനകാലത്തേക്കുള്ള സന്ദേശമാണെന്ന വിശ്വാസക്കാരനായിരുന്നു അദ്ദേഹം.