കല്‍പ്പറ്റ: മണ്ണാര്‍ക്കാടുകാരന്‍ അബ്ദുല്‍ ഗഫൂറിന്റെയും ഭാര്യ കുടക് സ്വദേശിനി സെറീനയുടെയും വിവാഹമോചനം ചര്‍ച്ചചെയ്യുന്നതിനു കോഴിക്കോട് ബേപ്പൂര്‍ റോഡിലെ മാത്തോട്ടം ന്യൂ ഹാളിലെത്തിയ തന്നെയും മാനന്തവാടിയില്‍നിന്നുള്ള അഭിഭാഷകനടക്കം മറ്റു മൂന്നു പേരെയും മണ്ണാര്‍ക്കാട് സി.ഐ അന്യായമായി കസ്റ്റഡിയിലെടുത്ത് പീഡിപ്പിച്ചതായി തരുവണ ഒതയോത്ത് അബൂബക്കര്‍ വാര്‍ത്താസമ്മേളനത്തില്‍ ആരോപിച്ചു.
കഴിഞ്ഞ 28ന് വൈകീട്ടാണ് സി.ഐയുടെ നേതൃത്വത്തില്‍ പൊലിസുകാര്‍ മഫ്തിയില്‍ ഹാളിലേക്ക് ഇരച്ചുകയറി താന്‍ ഉള്‍പ്പെടെയുള്ളവരെ കസ്റ്റഡിയിലെടുത്തത്.
പിന്നീട് നാട്ടുകല്‍ പൊലിസ് സ്റ്റേഷനില്‍ എത്തിച്ച് മര്‍ദിക്കുകയും പട്ടിണിക്ക്‌യിടുകയും ചെയ്തു. 29ന് രാത്രി മാനന്തവാടി ബാറിലെ ചില അഭിഭാഷകര്‍ എത്തിയതിനുശേഷമാണ് അറസ്റ്റ് രേഖപ്പെടുത്തി മജിസ്‌ട്രേറ്റിനു മുന്നില്‍ ഹാജരാക്കിയത്.
കോടതി റിമാന്‍ഡ് ചെയ്ത തങ്ങളെ ജയിലിലേക്ക് കൊണ്ടുപോകുന്നതിനു മുമ്പ് സി.ഐ പത്രക്കാരെയും ചാനലുകാരെയും വിളിച്ചുവരുത്തി പ്രഥമവിവര റിപ്പോര്‍ട്ടിലും പരാതിക്കാരന്റെ മൊഴിയിലും ഇല്ലാത്ത കാര്യങ്ങള്‍ പറഞ്ഞ് വാര്‍ത്തയും കൊടുത്തു.
പിറ്റേന്ന് ചില പത്രങ്ങളിലും ചാനലിലും വാര്‍ത്ത വന്നത് തനിക്കും കുടുംബത്തിനും കനത്ത മാനഷ്ടത്തിനു കാരണമായി.
അശ്ലീല ദൃശ്യങ്ങള്‍ പ്രചരിപ്പിക്കുമെന്ന് ഭീഷണിപ്പെടുത്തി പണം തട്ടിയെന്ന വ്യാജ പരാതിയില്‍ അകാരണമായി കസ്റ്റഡിയിലെടുത്തും അറസ്റ്റ് രേഖപ്പെടുത്തിയും പീഡിപ്പിച്ചതിനെതിരെ മുഖ്യമന്ത്രി, മനുഷ്യാവകാശ കമ്മിഷന്‍, സംസ്ഥാന പൊലിസ് മേധാവി എന്നിവര്‍ക്ക് പരാതി നല്‍കുമെന്ന് അബൂബക്കര്‍ പറഞ്ഞു.