കോഴിക്കോട്: ഏകസിവില്‍കോഡ് നടപ്പാക്കുന്നതിന് വേണ്ടി അഭിപ്രായം ആരാഞ്ഞ കേന്ദ്ര നിയമകമ്മിഷനുമായി ബന്ധപ്പെട്ട നടപടികള്‍ ബഹിഷ്‌കരിക്കാന്‍ ആഹ്വാനം ചെയ്ത മുസ്‌ലിം വ്യക്തിനിയമ ബോര്‍ഡിന് പിന്തുണ നല്‍കുന്നതായി ഐ.എന്‍.എല്‍ അഖിലേന്ത്യാ അധ്യക്ഷന്‍ പ്രൊഫ. മുഹമ്മദ് സുലൈമാനും, ജനറല്‍ സെക്രട്ടറി അഹമ്മദ് ദേവര്‍കോവിലും അറിയിച്ചു.
മുസ്‌ലിം വ്യക്തിനിയമത്തില്‍ പ്രത്യേകമായി ഇടപെടാനുള്ള കേന്ദ്രസര്‍ക്കാരിന്റെ നീക്കങ്ങള്‍ ഹിന്ദുത്വം വിഭാവനം ചെയ്യുന്ന മതരാഷ്ട്രം ലക്ഷ്യമിട്ടാണ്. അപലപനീയമായ ഈ നീക്കത്തിനെതിരേ മതേതര ശക്തികള്‍ ഒരുമിക്കണം.
മുത്തലാഖ്, ബഹുഭാര്യാത്വം തുടങ്ങിയ കാര്യങ്ങളില്‍ കേന്ദ്രസര്‍ക്കാര്‍ സുപ്രിംകോടതിയില്‍ സമര്‍പ്പിച്ച സത്യവാങ്മൂലം ഭരണഘടന വാഗ്ദാനം ചെയ്യുന്ന മതപരവും സാംസ്‌കാരികവുമായ അവകാശങ്ങളുടെ നഗ്‌നമായ ലംഘനമാണെന്നും അവര്‍ പറഞ്ഞു.