ഫറോക്ക്: അനധികൃത മത്സ്യബന്ധനം നടത്തിയതിന് ഒരുബോട്ടും നാല് വള്ളവും ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് പിടികൂടി. ഒഴിവുദിനങ്ങളില്‍ കേരള തീരത്ത് അനധികൃത മത്സ്യബന്ധനം വന്‍തോതില്‍ നടക്കുന്നുണ്ടെന്ന തിരുവനന്തപുരത്തെ മറൈന്‍ എന്‍ഫോഴ്‌സ്‌മെന്റ് ആസ്ഥാനത്തുനിന്നും ലഭിച്ച രഹസ്യവിവരത്തെതുടര്‍ന്നു നടത്തിയ പരിശോധനയിലാണ് ബോട്ടും വള്ളവും പിടികൂടിയത്. നിരോധനം ലംഘിച്ചു വ്യാപകമായി വളമത്സ്യങ്ങള്‍ പിടിച്ചതിനാണ് ബോട്ടും വള്ളവും കസ്റ്റഡിയിലെടുത്തത്.  
 പുതിയാപ്പക്കും കൊയിലാണ്ടിക്കുമിടയില്‍ കടലില്‍നടത്തിയ തെരച്ചിലിലാണ് വളത്തിനുവേണ്ടിമാത്രം ഉപയോഗിക്കുന്ന ചെറുമത്സ്യങ്ങളുമായി ബോട്ടും വള്ളവും കണ്ടെത്തിയത്. കോഴിക്കോട് പുളിയകണ്ടി പുതിയപുരയില്‍ പ്രേംകുമാറിന്റെ ഉടമസ്ഥതയിലുള്ള ശ്രീകൃഷ്ണ എന്ന ബോട്ടും, കൊയിലാണ്ടി ചെറിയ മങ്ങാട് പുതിയപുരയില്‍ പി.സി സന്തോഷിന്റെ പേരിലുള്ള എഷ്യാസ്, കൊയിലാണ്ടി വലിയ പുരയില്‍ തണ്ണീമുഖത്ത് ടി.വി രാജീവിന്റെ സൂര്യ, ചേമഞ്ചേരി ഏരൂള്‍ വീട് സിറാജിന്റെ പേരിലുള്ള ടാറ്റാ കാപ്പാട്, എലത്തൂര്‍ പുതിയ നിരത്ത് പോത്തൂട്ടിക്കണ്ടി സദാനന്ദന്റെ ഹരിദീപം എന്നീ പേരുകളിലുള്ള വള്ളങ്ങളുമാണ് വളമത്സ്യവുമായി ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് എസ്.ഐ സുജിത്തിന്റെ നേതൃത്വത്തിലുള്ള സംഘം പിടികൂടിയത്. പിടിച്ചെടുത്ത ബോട്ടിലെയും വള്ളങ്ങളിലെയും ഭക്ഷ്യയോഗ്യമല്ലാത്ത മൂന്നരലക്ഷത്തോളം വളമത്സ്യം കടലില്‍ തള്ളി. ബോട്ടില്‍ മാത്രം ഒന്നര ലക്ഷത്തോളം രൂപയുടെ ചെറുമത്സ്യങ്ങളുണ്ടായിരുന്നു. പിടിച്ചെടുത്ത ബോട്ട്, വളളം, വലകള്‍ അനുബന്ധ സാമഗ്രികള്‍ എല്ലാം ഫിഷറീസ് അസിസ്റ്റന്റ് ഡയറക്ടര്‍ക്ക് കൈമാറി. ഉടമകള്‍ക്ക് വന്‍തുക പിഴചമത്തും. ന
ഉദ്യോഗസ്ഥരുടെ കണ്ണുവെട്ടിക്കാന്‍ നീണ്ട ഒഴിവ് ദിനങ്ങളില്‍ അനധികൃത മത്സ്യബന്ധനത്തിനായി ബോട്ടുകളും വള്ളങ്ങളും ഒന്നിച്ചു കടലിലിറങ്ങുകയായിരുന്നു. അയല, മത്തി, തുടങ്ങിയ മത്സ്യങ്ങളുടെ കുഞ്ഞുങ്ങളെയാണ് പിടിച്ചെടുത്തിരുന്നത്. ഇത്തരം ചെറുമത്സ്യങ്ങള്‍ തമിഴ്‌നാട്, കര്‍ണാടക സംസ്ഥാനങ്ങളിലേക്ക് കയറ്റിയയക്കും.