മാഡ്രിഡ്: സ്പാനിഷ് ലാ ലിഗയില്‍ മാഡ്രിഡ് ടീമുകളായ റയല്‍ മാഡ്രിഡും അത്‌ലറ്റിക്കോ മാഡ്രിഡും ഗോളടിച്ചുകൂട്ടി വിജയിച്ചു. അത്‌ലറ്റിക്കോ 7-1നു ഗ്രാനാഡയെ വീഴ്ത്തിയപ്പോള്‍ റയല്‍ 6-1നു റയല്‍ ബെറ്റിസിനെ തകര്‍ത്തു. ഒരു ഗോളിനു പിന്നില്‍ നിന്ന ശേഷമാണ് അത്‌ലറ്റിക്കോ ഏഴെണ്ണം തിരിച്ചടിച്ചത്.
കരാസ്‌ക്കോ ഹാട്രിക്കും ഗെയ്റ്റന്‍ ഇരട്ട ഗോളുകളും നേടിയപ്പോള്‍ കൊരേയ, തിയാഗോ എന്നിവര്‍ ശേഷിച്ച ഗോളുകള്‍ നേടി പട്ടിക പൂര്‍ത്തിയാക്കി. എവേ മത്സരത്തിലാണ് റയലിന്റെ തകര്‍പ്പന്‍ ജയം. റയലിനായി ഇസ്‌കോ ഇരട്ട ഗോളുകള്‍ നേടി. ക്രിസ്റ്റ്യാനോ റൊണാള്‍ഡോ, മാഴ്‌സലോ, ബെന്‍സെമ, വരാനെ എന്നിവരും വല ചലിപ്പിച്ചു.
മറ്റു മത്സരങ്ങളില്‍ റയല്‍ സോസിഡാഡാനെ അത്‌ലറ്റിക്ക് ബില്‍ബാവോ 3-2നു വീഴ്ത്തി. മലാഗ- ആല്‍വെസ് പോരാട്ടം 1-1നു സമനില. പോയിന്റ് പട്ടികയില്‍ 18 പോയിന്റുകളുമായി അത്‌ലറ്റിക്കോ ഒന്നാമതും ഇത്രയും പോയിന്റുള്ള റയല്‍ രണ്ടാം സ്ഥാനത്തും. 17 പോയിന്റുമായി ബാഴ്‌സലോണ മൂന്നാമത്.
മിലാന്‍: ഇറ്റാലിയന്‍ സീരി എയില്‍ യുവന്റസ് 2-1നു ഉദീനിസയെ പരാജയപ്പെടുത്തി. മറ്റൊരു മത്സരത്തില്‍ ഇന്റര്‍ മിലാനെ കഗ്ലിയാരി 1-2നു അട്ടിമറിച്ചു. ലാസിയോ- ബൊലോഗ്ന പോരാട്ടം 1-1നും ഫിയോരെന്റിന- അറ്റ്‌ലാന്റ, ജെനോവ- എംപോളി മത്സരങ്ങള്‍ ഗോള്‍രഹിതമായും സമനില.
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ വാട്‌ഫോര്‍ഡ് 1-0ത്തിനു മഡില്‍സ്‌ബ്രോയെ വീഴ്ത്തി. മറ്റൊരു മത്സരത്തില്‍ സതാംപ്ടന്‍ 3-1നു ബേണ്‍ലിയെ പരാജയപ്പെടുത്തി.