തിരുവമ്പാടി: റബ്ബര്‍ഷീറ്റ് മോഷണം തൊഴിലാക്കിയ രണ്ടു പേര്‍ തിരുവമ്പാടി പൊലിസിന്റെ പിടിയില്‍. താമരശ്ശേരി ചമല്‍ സ്വദേശികളായ ചന്ദ്രബോസ് (38), സുരേഷ് എന്നിവരാണ് പിടിയിലായത്. തിങ്കളാഴ്ച രാത്രി നൈറ്റ് പട്രോളിങിനിടയിലെ വാഹന പരിശോധനയിലാണ് ഇവര്‍ പൊലിസിന്റെ പിടിയിലാവുന്നത്. കാറില്‍ നിന്ന് ലഭിച്ച റബ്ബര്‍ ഷീറ്റുകളെക്കുറിച്ച് വ്യക്തമായ വിശദീകരണം ലഭിക്കാത്തതിനെത്തുടര്‍ന്ന് കസ്റ്റഡിയിലെടുക്കുകയായിരുന്നു. തുടര്‍ന്നുള്ള ചോദ്യം ചെയ്യലിലാണ് താമരശ്ശേരി ചമല്‍ഭാഗത്ത് നിന്ന് മോഷ്ടിച്ചതാണന്ന് മനസിലായത്.
ഇവരുടെ കൈയില്‍ നിന്ന് 409 കിലോഗ്രാം റബര്‍ ഷീറ്റുകളാണ് പിടികൂടിയത്.  മറ്റു മോഷണങ്ങളിലും ഇവര്‍ ഉള്‍പ്പെട്ടതായി സംശയമുണ്ടന്നും പൊലിസ് പറഞ്ഞു. വാഹന പരിശോധനക്ക് എസ്. ഐ ശംഭുനാഥ്, സി.പി.ഒമാരായ ശൈലേന്ദ്രകുമാര്‍, നൗഫല്‍ എന്നിവര്‍ നേതൃത്വം നല്‍കി.