തിരൂരങ്ങാടി: വിദ്യാര്‍ഥികളെ ബസ് ജീവനക്കാര്‍ കൈയേറ്റം ചെയ്തു ബസില്‍നിന്നും ഇറക്കിവിട്ടതായി പരാതി. ഏഴു വിദ്യാര്‍ഥികള്‍ ആശുപത്രിയില്‍ ചികിത്സ തേടി. തിരൂരങ്ങാടി പി.എസ്.എം.ഒ കോളജ് വിദ്യാര്‍ഥികളായ നന്നമ്പ്ര തെയ്യാലസ്വദേശി ഫര്‍സാന (19), തെയ്യാല സ്വദേശിനിയും ഹരിത എം.എസ്.എഫ് ജില്ലാ വൈസ് പ്രസിഡന്റുമായ ഫാത്തിമ ഷിഹാന (18), കുണ്ടൂര്‍ അത്താണിക്കല്‍ സ്വദേശിനി മുര്‍ഷിന (19), താനൂര്‍ സ്വദേശിനി അര്‍ത്ഥന (19) കൊടിഞ്ഞി സ്വദേശി സമീദ് (18), തിരൂരങ്ങാടി സ്വദേശി നസീഫ് (18), മൂന്നിയൂര്‍ കളിയാട്ടമുക്ക് സ്വദേശി നവാസ് (19) എന്നിവരെയാണു പരുക്കുകളോടെ തിരൂരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചത്. ഇന്നലെ വൈകുന്നേരം ആറിനാണു സംഭവം.
ചെമ്മാട് നിന്നും താനൂരിലേക്കു പോകുകയായിരുന്ന കെ.എല്‍. 55 ഇ 8581 നമ്പറിലുള്ള അല്‍ അമീന്‍ ബസിലെ ജീവനക്കാര്‍ക്കെതിരെയാണു പരാതി. ചൊവ്വാഴ്ച യാത്രക്കിടെ ബസില്‍വെച്ചു ജീവനക്കാര്‍ മോശമായി പെരുമാറിയതായും പാതിവഴിയില്‍ വെന്നിയൂരില്‍ ഇറക്കിവിട്ടതായും വിദ്യാര്‍ഥികള്‍ പറഞ്ഞു. സംഭവത്തെക്കുറിച്ച് കോളജ് പരിസരത്തു വെച്ച് ഇന്നലെ വിദ്യാര്‍ഥികള്‍ ബസ് ജീവനക്കാരെ ചോദ്യംചെയ്തിരുന്നു. കൂടാതെ ഇതേബസില്‍ ഇവരെ കയറ്റിവിടുകയും ചെയ്തു. എന്നാല്‍ യാത്രാമധ്യേ ബസില്‍നിന്നും ജീവനക്കാര്‍ മൊബൈല്‍ഫോണില്‍ വിദ്യാര്‍ത്ഥിനികളുടെ ഫോട്ടോ എടുത്തതായും ഇതു ചോദ്യം ചെയ്തതിനുകൈയ്യേറ്റം ചെയ്തു വെന്നിയൂരില്‍ ഇറക്കിവിട്ടതായും വിദ്യാര്‍ത്ഥികള്‍ പറഞ്ഞു. വിദ്യാര്‍ഥികളുടെ പരാതിയില്‍ ബസ് ജീവനക്കാരനായ ചുള്ളിപ്പാറ സ്വദേശി സമീറിനെ പൊലിസ് കസ്റ്റഡിയിലെടുത്തിട്ടുണ്ട്.