ജിദ്ദ: റിയാദിന് സമീപമുള്ള സഊദി അരാംക്കോ എണ്ണ ശുദ്ധീകരണ ശാലയില്‍ തീപിടുത്തം. അപകടത്തില്‍ പത്തിലധികം ജീവനക്കാര്‍ക്ക് പരുക്കേറ്റു. ഇതില്‍ മൂന്നു പേരെ റിയാദിലെ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്.

പ്രാഥമിക വിവരങ്ങള്‍ പ്രകാരം, എണ്ണ ശുദ്ധീകരണ ശാലയിലെ ടാങ്കിനുള്ളിലുണ്ടായ സ്‌ഫോടനമാണ് തീപിടുത്തത്തിന് കാരണം. തീ നിയന്ത്രണ വിധേയമായതായി അരാംക്കോ കമ്പനി അധികൃതര്‍ അറിയിച്ചു.

കഴിഞ്ഞ സെപ്തംബര്‍ മാസം, സഊദി അരാംക്കോയുടെ റാസ് തനൂറയിലെ എണ്ണ ടെര്‍മിനലിലും തീപിടുത്തം നടന്നിരുന്നു. തീപിടുത്തത്തില്‍ രണ്ട് അറാംക്കോയുടെ ജീവനക്കാരുള്‍പ്പെടെ എട്ട് പേര്‍ക്കായിരുന്നു അന്ന് പരുക്കേറ്റിരുന്നത്.