തലശ്ശേരി:വിദൂര വിദ്യാഭ്യാസ പഠന കേന്ദ്രത്തില്‍ നിന്നും വിവിധ സര്‍വകലാശാലകളുടെയും സ്ഥാപനങ്ങളുടെയും വ്യാജ സര്‍ട്ടിഫിക്കറ്റുകള്‍ പിടിച്ചെടുത്ത കേസ് ക്രൈംബ്രാഞ്ചിന് കൈമാറുന്നു. ഒട്ടേറെ പ്രമുഖര്‍ സര്‍ട്ടിഫിക്കറ്റ് കൈപ്പറ്റിയവരുടെ പട്ടികയിലുള്ളതും അന്വേഷണം അന്യസംസ്ഥാനത്തേക്കു കൂടി വ്യാപിപ്പിക്കുന്നതിനുമാണ് കേസ് കൈമാറുന്നത്. ലോക്കല്‍ പൊലിസ് അന്വേഷിച്ച കേസില്‍ വിവിധ കോണില്‍ നിന്നും സമ്മര്‍ദമുണ്ടായിരുന്നു. തുടര്‍ന്നാണ് കേസ് ക്രൈംബ്രാഞ്ചിനെ ഏല്‍പ്പിക്കാന്‍ തീരുമാനിച്ചത്. സെപ്തംബര്‍ 29നാണ് തലശ്ശേരി കടല്‍പ്പാലം റോഡിലെ അമര്‍ ബില്‍ഡിങില്‍ പ്രവര്‍ത്തിക്കുന്ന അമൃത കോളജില്‍ നിന്ന് വ്യാജ ബിരുദ സര്‍ട്ടിഫിക്കറ്റുകള്‍ പിടിച്ചെടുക്കുന്നത്. ഉടമ പിണറായി പാറപ്പുറത്തെ വടക്കയില്‍ അജയന്‍(46),തിരുവനന്തപുരം വട്ടിയൂര്‍ക്കാവ് സ്വദേശി ഹില്‍വ്യൂവില്‍ ടിന്റു (30) എന്നിവരെ അറസ്റ്റു ചെയ്തിരുന്നു. ഇരുവര്‍ക്കും കോടതി ജാമ്യം അനുവദിച്ചിട്ടുണ്ട്.
തിങ്കള്‍, വ്യാഴം ദിവസങ്ങളില്‍ അന്വേഷണ ഉദ്യോഗസ്ഥന്റെ മുന്നില്‍ ഹാജരാകണമെന്നും പാസ്‌പോര്‍ട്ട് കോടതിയില്‍ നല്‍കണമെന്നുമുള്ള വ്യവസ്ഥകളോടെയാണ് ജാമ്യം അനുവദിച്ചത്. സെപ്തംബര്‍ 30നാണ് ഇരുപ്രതികളെയും കോടതി റിമാന്‍ഡ് ചെയ്തത്.