പൂക്കോട്ടുംപാടം: കൃഷിയെക്കുറിച്ചു പഠിക്കാനും മനസിലാക്കാനും കുട്ടികള്‍ പാടത്തിറങ്ങി. പൂക്കോട്ടുംപാടം ഗവ ഹയര്‍സെക്കന്‍ഡറി സ്‌കൂളിലെ എട്ടാംക്ലാസ് വിദ്യാര്‍ഥികളാണു കഴിഞ്ഞ ദിവസം അധ്യാപകരുടെ സഹായമൊന്നുമില്ലാതെ ചേലോട് പാടശേഖരത്തെത്തിയത്.
പാക്കറ്റുകളിലായി വീട്ടിലെത്തുന്ന അരിയാഹാരം എങ്ങനെയാണ് ഉണ്ടാക്കുന്നതെന്ന് അറിയാനുള്ള ജിജ്ഞാസയാണു കുട്ടികളെ പാടത്തെത്തിച്ചത്. ഞാറു പറിച്ചും നട്ടും കുട്ടിസംഘം തൊഴിലാളികളുമായി കുറേസമയം ചെലവഴിച്ചു.
റുമാന, ആതിര തുടങ്ങിയവരുടെ നേതൃത്വത്തിലുള്ള എട്ടു പെണ്‍കുട്ടികളാണു കൂട്ടുകാരിയുടെ വീട്ടില്‍ വന്നപ്പോള്‍ നെല്‍കൃഷി നടത്തുന്നതു കണ്ടു വയലില്‍ ഇറങ്ങിയത്. നാട്ടില്‍ നിന്നും അന്യമായിക്കൊണ്ടിരിക്കുന്ന നെല്‍കൃഷിരീതിയെ കുറിച്ചും ഉല്‍പ്പാദനത്തെ കുറിച്ചും പാടശേഖരത്തിലെ കര്‍ഷകനായ സുബ്രഹ്മണ്യന്‍ കുട്ടികള്‍ക്കു വിശദീകരിച്ചു.
ആരുടേയും പ്രേരണയില്ലാതെയാണുകുട്ടികള്‍ പാടത്തെത്തിയത്. ഉച്ചയോടെ ചളിയും ചേറുംപുരണ്ട വസ്ത്രങ്ങള്‍ കഴുകി വൃത്തിയാക്കിയും കൊയ്ത്തിനു കാണാമെന്നു പറഞ്ഞു കുട്ടികള്‍ പിരിഞ്ഞു.